ЕЛОРДА ИМАМДАРЫНА «АЛАШ ҚАЙРАТКЕРЛЕРІНІҢ БІРЛІГІ» АТТЫ СЕМИНАР ҰЙЫМДАСТЫРЫЛДЫ (ФОТО)

Бүгін Астана қаласындағы «Сәдуақас қажы Ғылмани» мешітінде Елорда имамдарына арналған «Алаш қайраткерлерінің бірлігі» атты тарихи-танымдық семинар ұйымдастырылды. Семинарға қала бас имамы Ерболат Жүсіпов бастаған дін қызметкерлері қатысып, Алаш қайраткерлерінің өмір мен өнегесіне қанықты.

Ашылу сөзін сөйлеген Астана қаласының бас имамы Ерболат Жүсіпов алаштану ғылымының, олардың өнегесінің бүгінгі діни қызметкерлер мен қоғам үшін маңыздылығына тоқталды. Бас мүфти Наурызбай қажы Тағанұлының бағдарлық баяндамасында діни кадрлардың ұлттық руханиятты қанық білуі керектігі айтылып, ел медреселеріне «Алаштану» пәні енгізу жоспары жайлы айта келіп, осы бастама аясында өтіп жатқан бүгінгі шараға ризашылығын жеткізді.

Семинар спикері журналист, абайтану, ұлттық дүниетаным тақырыбын зерделеп жүрген Оразбек Сапархан «Алаш қайраткерлерінің бірлігі: қалыптасу себептері мен алғышарттары, формасы мен мазмұны» атты дәріс оқыды. Дәріс барысында Алаш қайраткерлерінің қайраткерлік тұлғасы мен өзара береке-бірлігінің қалыптасу себептері, алғышарттары, қозғалыстың ояну эвалюциясы, Алаш Орданың жоғарғы саяси элитасы арасындағы бірліктің формасы мен мазмұнын тарихи оқиғалармен, нақты фактілермен баяндалды.

Дереккөз: Muslim.kz