БАС МҮФТИ ӘЙЕЛ ҰСТАЗДАРҒА СЕРТИФИКАТ ТАБЫСТАДЫ (ФОТО)

Қазақстан мұсылмандары діни басқармасының төрағасы Наурызбай қажы Тағанұлы мүфтиятта өткен «Деструктивті діни ағымдардың негізгі сипаттары және оңалту жұмысын жүргізудің тиімді жолдары» семинарының қорытынды рәсіміне арнайы қатысты.

Бас мүфти Әйел-қыздар секторының ұйымдастыруымен өткен шарада: «Қазақта «Ана бір қолымен бесікті тербетсе, екінші қолымен әлемді тербетелі» деген қанатты сөз бар. Бұл әйел адамның тұтас ұлын не қызын ғана емес, тұтас ұлтты тәрбиелейтінін білдірсе керек. Қазіргі кездегі ата дінімізді, көркем сенімімізді қоғамға құбыжық етіп көрсетіп жатқан түрлі ағымдар бар. Оларға жас өскін еріп кетпеуі үшін шаңырақтың ұйытқысы болған ару-аналарымыздың тәрбиесі өте маңызды. Осы орайда әйел жамағатымен тығыз байланыстағы өздеріңіздің еңбектеріңізді ерекше атап өткім келеді. Сауапты һәм жауапты қызметтеріңізге Алла береке берсін» деді.

Сондай-ақ ҚМДБ Төрағасы аталмыш семинарға қатысқан әйел ұстаздарға сертификат табыс етті.

Айта кетейік, Әйел-қыздар секторының өңірлердегі жауапты өкілдері мен Астана қаласының ұстаздары қатысқан семинарда Дін мен дәстүр бөлімінің меңгерушісі Нұрбек Әуесханұлы және Діни оңалту бөлімінің меңгерушісі Хасан Аманқұл насихат айтып, кеңестерін бөлісті. Ал семинардың негізгі бөлімін Діни оңалту бөлімінің маманы Данияр Кенжалин жүргізді.

Дереккөз: ҚМДБ Баспасөз қызметі