БАС ИМАМ «РАХЫМҚЫЗЫ РАИСА АНА» МЕШІТІНДЕ ЖҰМА НАМАЗЫН ӨТКІЗДІ

Бүгін қасиетті жұма күні Астана қаласының бас имамы Нұрбек қажы Әуесханұлы Сарыарқа ауданындағы «Рақымқызы Раиса ана» мешітінде жұма намазын өткізіп, жамағатқа «Неке – салауатты өмірдің берік негізі» тақырыбында уағыз айтты.

Уағыз барысында бас имам отбасы институтының қоғамдағы маңызына тоқталып, неке – тек екі адамның арасындағы келісім емес, Алланың алдында алынған жауапты аманат екенін жеткізді. Сондай-ақ ерлі-зайыптылар арасындағы өзара құрмет, мейірім, сабыр мен жауапкершілік берекелі отбасының басты тірегі екенін атап өтті.

«Неке – мұсылман өміріндегі ең қасиетті құндылықтардың бірі. Берік отбасы өзара құрметтен, жауапкершіліктен және Алла разылығы үшін жасалған ізгі қарым-қатынастан басталады. Отбасын сақтау – әрбір мұсылманның маңызды міндеті», – деді Нұрбек қажы Әуесханұлы.

Сонымен қатар бас имам жастарды неке мәселесіне жеңіл қарамауға, ата-ананың ақ батасын алып, отбасы өмірін ислам құндылықтары негізінде құруға шақырды. Сондай-ақ бала тәрбиесінде ата-ананың өнегесі мен көркем мінезінің шешуші рөл атқаратынын айтып, қоғамдағы береке мен тұрақтылықтың бастауы – берік отбасы екенін жеткізді.

Жұма намазы соңында елдің амандығы мен бірлігіне, отбасының тыныштығы мен берекесіне дұға жасалды.

Дереккөз: ҚМДБ Астана қаласы өкілдігінің баспасөз қызметі