АСТАНА ҚАЛАСЫНЫҢ БАС ИМАМЫ ЗАҒИПТАР КІТАПХАНАСЫН ЗИЯРАТ ЕТТІ (ФОТО)

ҚМДБ Астана қаласының өкілі, «Әзірет Сұлтан» мешітінің Бас имамы Ерболат Жүсіпов бастаған имамдар Астана қаласының көзі көрмейтін және нашар көретін азаматтарға арналған арнайы кітапханасына ат басын бұрып, сол жердегі оқырман қариялармен басқосты.

Өкіл имам Ерболат Нұрылдаұлы тағдырдың басқа салған қиындығына мойымай, мүмкіндігі жеткенше білім іздену жолына түскен қарттарға сөз демеуін беріп, ілім ізденудің сауабы мен дүниелік және ақыреттік пайдаларын тілге тиек ете кетті.

Сонымен қатар ақ жаулықты аналарымыз бен ақсақалдарға мұсылманша кәдесыйлар үлестіріліп, ҚМДБ Астана қаласы өкілдігі атынан алғыс хаттар табысталды. Және де Брайль шрифтімен жазылған Құран Кәрім кітаптары кітапхана қорына сыйға берілді.

Ақсақалдар қауымы да өздерін зиярат етіп келіп отырған дін қызметкерлеріне өз алғыстары мен ризашылықтарын білдіре отырып, ақ батасын берді.

Жиыннан соң Бас имам кітапхана жұмысымен танысып, қажетті материалдарды брайль жүйесі бойынша басып шығаратын техникалық жабдықтармен танысты.

Суреттерді толығырақ «ФОТОГАЛЕРЕЯ» айдарынан көре аласыздар!