Alla keshirmeıtin kúnálar bar ma?
Assalaýmaǵaleıkým! Alla Taǵala keshirmeıtin kúnálar bola ma?
Ответ
Jaratýshy Iemiz Taǵala sheksiz rahym-meıirimimen pendeleriniń túrli kúnálaryn keshirse de, Ózinen basqaǵa jalbarynyp, odan qajetin surap, tabynýdy eshqashan da keshirmeıdi. Haq Taǵala muny kúlli adamzatqa Quran Kárim aıattarynda jáne Paıǵambary (s.ǵ.s.) arqyly qatań túrde eskertip ótken. Mysaly, «Nısa» súresinde Jaratqan Iege ortaq qosýdyń eń úlken keshirilmes kúná ekendigi naqtyly túrde aıtylǵan:
«Shyndyǵynda, Alla Ózine serik qosqandy keshirmeıdi, al odan basqany (basqa kúnáni) qalaǵan pendesine keshiredi. Kimde-kim Allaǵa serik qossa, ol qatty adasady»[1].
Alladan basqadan járdem surap, ǵıbadat duǵasyn jasaý nemese Jaratýshydan ózgeniń kúshi jetpeıtin nárseni suraý – múshriktik amal, ıaǵnı Qudaıǵa kópe-kórneý serik qosý. Bul týraly Alla Taǵala Quran Kárimde búkil ıman keltirgenderdi bylaısha eskertken:
«Allamen birge táńir shaqyrma. Onda sen de azapqa ushyraýshylardan bolasyń»;[2]
«Jáne de Alladan ózge saǵan paıda, zııan keltire almaıtyn nárselerge jalbarynba. Eger ony isteseń, onda kúdiksiz sen zalymdardan bolasyń»;[3]
«Senderdiń Alladan ózge shoqynǵandaryń senderge de járdem ete almaıdy ári ózderine de járdem ete almaıdy»[4].
Alla Taǵalaǵa duǵa qylý, qalaǵan tilekti suraý qandaı da bir deldaldyń, ortaqtyń esh qajettigini joq ekendigi týraly qasıetti aıattarda taıǵa tańba basqandaı aıqyn túrde baıandalǵan.
«Eger quldarym Men týraly senen surasa, Men óte jaqynmyn. Qashan Menen tilese, tileýshiniń tilegin qabyl etemin. Endeshe olar da ámirimdi qabyl etsin. Jáne Maǵan sensin. Árıne, týra jol tapqan bolar edi».[5]
Paıǵambar (s.ǵ.s.) da óz hadısterinde qajetti bir Alladan suraý kerektigin basa aıtqan. Duǵa, medet tileýdiń jaı-japsaryn tolyq túsindirip ótken. Solardyń eń biregeıi, tómendegi ósıet-hadısi.
Abdýlla ıbn Abbas (r.a.) bylaı dedi: «Paıǵambardyń (s.ǵ.s.) artynda kele jatqanda maǵan: «Eı, balaqaı! Men saǵan myna sózderdi úıretemin: Allany saqta (ıaǵnı, jadyńnan shyǵarma), sonda Ol seni saqtaıdy. Allany saqta, sonda ony aldyńnan tabasyń. Birdeńe surasań, Alladan sura. Járdem tileseń, Alladan tile. Búkil halyq jınalyp saǵan bir paıda keltirmek bolsa, tek Alla jazǵan nárseni ǵana keltire alatyndyǵyn jáne olar saǵan bir zııan keltirmekke jıylsa da, tek Allanyń jazǵanyn ǵana keltire alatyndyǵyn bilgeısiń. Qalamdar kóterildi, paraqtar keýip ketti (ıaǵnı, taǵdyr taqtasyna bári jazyldy)»[6], – dedi.
Negizinde ólilerge, jyndarǵa qaıyrylyp, solardan járdem suraý duǵa bolyp esepteledi. Al duǵa etý, shaqyrý – qulshylyqtyń bir túri. Qulshylyq tek bir Qudaı Taǵalaǵa ǵana laıyq. Al, basqaǵa qulshylyq qylý aqıqatqa jala jabý, serik qosý bolyp tabylady.
Nuǵman ıbn Báshırdiń (r.a.) aıtýynsha, Paıǵambar (s.ǵ.s.): «Duǵa – ǵıbadat», – dep, «Rabbylaryń: «Maǵan jalbarynyńdar! Tilekterińdi qabyldaımyn» degen aıatty oqyǵan[7].
