Ishkilikti balgerge baryp qoıdyrýǵa bolady ma?

Sálemetsizder me? Meniń suraǵym emshilik týraly. Aǵam araq ishedi jáne kúnnen-kúnge onyń sońyna ábden túsip kele jatyr. Eshqandaı sóz súıeginen ótpeıdi, sanasyna jetpeıdi. Jaqynda jeńgem bir qurbysynyń kúıeýi sol araqty ishýin qoıǵanyn, oǵan sebep emshiniń Quranmen oqytyp bergen bir túımedeı birdeńeni kúıeýiniń ishetin shaı sýymen birge qaınatyp berý ekenin aıtty. Emshi adamnyń fotosyna qarap otyryp onyń nemen aýyratynyn, araqty qoıyp kete alý múmkindiginiń bar-joǵyn aıtady eken daǵy, jańaǵydaı oqylǵan býıymdar beredi. Osyndaı kisilerge barýǵa bola ma? Bul kisiniń emshi ekenin álde balshy-balger ekenin túsine almaı otyrmyn. Saltanat

Ответ

Sálemetsiz be, Saltanat! 

Alla Taǵala qandaı da bir dert berse, mindetti túrde onyń emin de qosa beredi. Bizdiń mindetimiz – sol emdi tynbaı izdeý. Araq qoıdyrýǵa baılanysty medıtsınada birneshe ádis qalyptasqan. Máselen arnaıy dáriler bar.

Sahaba Ábý Huraıra (r.a.) Paıǵambarymyzdyń (s.ǵ.s.):

عن أبي هريرة رضي الله عنه عن النبي صلى الله عليه وسلم قال ما أنزل الله داء إلا أنزل له شفاء

«Alla qandaı da bir dert túsirse, mindetti túrde onyń emin de túsiredi», – degen hadısin jetkizedi.

Al, sizdiń sózińizdi saralaı otyryp, ol emshiniń balshy-balger ekendigin aıtýǵa bolady. Sondyqtan ondaı adamǵa barýǵa sharıǵı turǵydan bolmaıdy. Óıtkeni, ol ǵaıyp bir isti boljap otyr. Al, Qasıetti Quran aıattary men hadısterde ǵaıyp ister jaıly boljam jasaýdyń úlken kúná ekendigi eskertilgen.

قَالَ اللهُ تَعَالَى: ﴿قُلْ لا يَعْلَمُ مَنْ فِي السَّمَاوَاتِ وَالْأَرْضِ الْغَيْبَ إِلَّا اللَّهُ وَمَا يَشْعُرُونَ أَيَّانَ يُبْعَثُونَ ﴾

Alla Taǵala bylaı deıdi: «(Ýa, Muhammed) Alladan ózge kókter men jerdegilerdiń eshbiri ǵaıypty bilmeıdi. Olar ózderiniń qashan tiriletinderin de sezbeıdi dep aıt».

عَنْ عَبْدِ اللهِ بْنِ مَسْعُودٍ رَضِيَ اللهُ عَنْهُ، قَالَ: قَالَ رَسُولُ اللهِ صَلَّى اللَّهُ عَلَيْهِ وَسَلَّمَ: «مَنْ أَتَى عَرَّافاً أَوْ كَاهِناً فَصَدَّقَهُ بِمَا يَقُولُ فَقَدْ كَفَرَ بِمَا أُنزِلَ عَلَى مُحَمَّدٍ». رَوَاهُ الْحَاكِمُ.

Abdýlla ıbn Masǵudtan (r.a.) jetken rıýaıatta Allanyń Elshisi (s.ǵ.s.): «Kimde-kim balgerge ne baqsyǵa baryp, onyń aıtqanyn rastasa, ol Muhammedke túsirilgenge (Islam dinine) kúpirlik keltiredi», – dep eskertken.

Alla isińizge jeńildik násip etsin!