Marqum ata-anadan keshirim qalaı suralady?

Assalamý aleıkým! Anam dúnıe salǵanyna kóp bola qoıǵan joq. Ómiriniń sońǵy aılarda meniń úıimde boldy. Aýrýshań kisi bolǵan soń, anany-mynany istep ber dep kóp aıtady. Kúndiz shamam kelgenshe istep júrdim, al tún mezgilde jumys bar, basqa bar degendeı sharshap isteı almaǵan kezderim kóp boldy. Anam qaıtys bolǵan soń, ózimdi qoıarǵa jer tappaı júrmin. Ózimdi kináli sezinemin, anamnan qalaı keshirim surasam bolady? Samat

Ответ

Ýa aleıkým assalam!

Ana aldynda perzenttik paryzyńyzdy durys óteı almadym dep sezinseńiz, eń áýeli Alla Taǵalaǵa shynaıy táýbe etken durys. Munan soń, qate-kúnásiniń keshirilýi úshin anańyzǵa arnap duǵa jasańyz jáne anańyzdyń atynan sadaqa berińiz.

Sonymen birge, anańyzdyń týystarymen ara-qatynasyńyzdy túzeńiz. Óıtkeni, bir kisi Alla elshisine (s.ǵ.s.) kelip: «Ýa, Alla elshisi! Ata-anam baqılyq bolǵan soń olarǵa meniń jasaıtyn taǵy da bir jaqsylyǵym bar ma?» - dep suraǵanda, Paıǵambar (s.ǵ.s.): «Iá, bar. Ata-anańa duǵa etý, olardyń aqysyna ıstıǵfar aıtý, olarǵa bergen ýádeni oryndaý, ekeýiniń aǵaıyn-týystarymen jaqsy qarym-qatynasta bolý jáne dos-jarandaryna jaqsylyq jasap turý»,[1] - degen eken.

Qoryta aıtqanda, adam balasy ata-anasyna baqılyq bolǵan soń da keshirim suraýyna jáne jaqsylyq jasaýyna múmkindigi bar. Degenmen, ata-ananyń kóńiline qaıaý túsirý úlken kúná jáne duǵa-tileginiń qabyl bolmaýynyń basty sebepteriniń biri ekenin umytpaǵan jón.