Kıim nemese bas kıim «sýtra» retinde jaramdy ma?

Ássálámýǵaleıkým ýa rahmatýllahı ýa barakatýh! Meshitterde «sýtra» retinde bas kıimdi ne bolmasa, ústindegi kıimderin paıdalanady. Al, fıqh kitaptarynda sýtranyń bıiktigi shamamen shyntaqtaı bolýy kerek delingen. Baskıimniń bıiktigi 5 sm jeter-jetpes. Baskıim sýtra retinde jaramdy ma? Talǵat

Ответ

Ýaǵaleıkým ássálám ýá rahmatýllahı ýá bárakátýh! Namaz oqýshy aldynan adamdardyń kesip ótýinen qaýiptense, jaınamaz mólsherindeı araqashyqtyqqa bir zat qoıady, ony «sýtra» deımiz. Sýtra qoıýdyń úkimi – mustahab. Qoımaǵan jaǵdaıda, jeńil mákrúh. Imamǵa uıyp oqylǵan namazdarda ımamnyń aldyndaǵy sýtrasy, arttaǵy jamaǵatqa da jaraıdy.

Sýtranyń uzyndyǵy (bıiktigi) - bir zıra (45-50 sm), eni eń kemi bir saýsaqtyń jýandyǵyndaı.

Degenmen, Paıǵambarymyzdyń (s.ǵ.s.) hadısinde: «... shash sekildi jińishke bolsa-daǵy»,[1] – degen sózin eskergen keıbir ǵulamalar: «sýtranyń eni (nemese jýandyǵy) mańyzdy emes» deıdi.

Al, bas kıim sýtra retinde jaramdy ma, joq  pa degenge kelsek, Hanafı ǵulamasy Ibn Ǵabıdınniń (r.a.) paıymdaýynsha, sýtraǵa jaraıtyn zat joq kezde kıimin nemese qolyndaǵy kitabyn sýtra retinde paıdalanýǵa bolady[2] (biraq, Quran kitapty emes). Osyǵan qaraǵanda, sýtraǵa jaramdy qandaı da bir zat tappaǵan namazhan baskıimin qoıyp jatsa, onysy sýtra úkiminde esepteledi degen oıdamyz.