Balany jubatý úshin namazdy buzýǵa bola ma?
Salamatsyzdar ma. Namaz oqyp jatqan ýaqytta besikte bala jylap jatsa ne isteý kerek? Mundaı jaǵdaıda namazdy toqtatyp kaıtadan oqýǵa bolady ma? Ótegenova M.
Ответ
Sálemetsiz be. Sizdiń máseleńizdi úsh bólikke bólip qarastyraıyq.
Birinshiden: Eger oqyp jatqan namazyńyz paryz namazy bolsa, onda ony sharıǵatpen kórsetilgen belgili jaǵdaılarsyz buzýǵa bolmaıdy. Sebebi, Alla Taǵala Quranda:
وَلا تُبْطِلُوا أَعْمَالَكُمْ
«Sondaı-aq, amaldaryńdy buzbańdar»,[1] – dep eskertken. Osy oraıda, fıqh ǵulamalary namazdy buzýǵa bolatyn jaǵdaılardy bylaı dep atap kórsetken. Olar: jylan syndy qaýipti jándikterdi óltirý, jyrtqyshtan qashý, óziniń nemese bireýdiń dúnıesin saqtap qalý úshin, bireýdi qaterli jaǵdaıdan qutqarý nemese sonyń aldyn alý úshin (kózi kórmeıtin adamnyń shuńqyrǵa túsip ketý qateri), uıqydaǵy nemese ǵapylda qalǵan adamdy naqty qaterden aldyn alý úshin (órt shyqqan úıde uıqtap jatqandardy oıatý syndy), batyp bara jatqan adamdy qutqarý, balasy úshin nemese ózi úshin qater paıda bolǵanda.
Ekinshiden: Eger balańyz besikte jatsa, onda oǵan qaýip tónbeıdi dep qarastyrylady. Eger qaýiptenseńiz ári balaǵa qaraıtyn basqa bireý bolmasa, namazyńyzdy buzýǵa bolady. Áıtpese, balanyń jylaǵany úshin ǵana namazdy buzýǵa bolmaıdy.
Úshinshiden: Balany jylatpaý úshin eger namaz ýaqyty keń bolsa, onda balany emizip, uıyqtatyp, sodan keıin namazyńyzdy oqyǵanyńyz jón. Sebebi balanyń jylaýy namazdan kóńildi bóledi. Alla Taǵala namazda barynsha basqa nársege alańdamaýǵa buıyryp:
وَاذْكُر رَّبَّكَ فِي نَفْسِكَ تَضَرُّعًا وَخِيفَةً
«Rabbyńa jalbaryna qoryqqan túrde zikir et»,[2] – degen.
Eger namaz ýaqyty shyǵyp ketedi dep qoryqsańyz, balany qolyńyzǵa alyp oqysańyz da bolady. Sebebi Paıǵambarymyz (s.ǵ.s) nemeresi Ýmamany (r.a) da kóterip turyp namazyn oqyǵan.[3]
Al, eger bala namaz oqyp jatqan kezde jylasa, onda namazyńyzdy jyldamyraq bitirińiz. Sebebi, Paıǵambarymyz (s.ǵ.s) bir sózinde: «Rasynda, men namazdy uzaǵynan oqyǵym keledi, alaıda kishkene balanyń jylaǵan daýysyn estigende sheshesine qıyn bolmasyn dep namazdy jyldam oqımyn»,[4] – degen.
Toqeteri: Besiktegi balanyń jylaǵany úshin namazyńyzdy buzbaısyz.
Sáttilik ıesi Alla ǵana.
Aıbek Ábdiqadyr
Muslim.kz saıtynyń dinı sarapshysy
