Qaınatanyń aldynda oramal taǵýym mindetti me?

Sálemetsizder me? Byltyr turmys qurdym. Jumysymyz qalada bolǵannan keıin bólek shyqtyq. Qazir qaınatam da qalaǵa keldi qydyryp. Bizben birge turady. Úıimiz kishkentaı, únemi oramalmen júrý yńǵaısyz. Suraǵym: qaınatamnyń aldynda oramal taǵyp júrýim mindetti me? B. Keńesqyzy

Ответ

Sálemetsiz be. Alla Taǵala Quranda balıǵatqa tolǵan qyz balasynyń kimniń aldynda oramal taqpaýyna bolatynyn tizbektep:

 وَلَا يُبْدِينَ زِينَتَهُنَّ إِلَّا لِبُعُولَتِهِنَّ أَوْ آبَائِهِنَّ أَوْ آبَاءِ بُعُولَتِهِنَّ أَوْ أَبْنَائِهِنَّ أَوْ أَبْنَاءِ بُعُولَتِهِنَّ أَوْ إِخْوَانِهِنَّ أَوْ بَنِي إِخْوَانِهِنَّ أَوْ بَنِي أَخَوَاتِهِنَّ أَوْ نِسَائِهِنَّ أَوْ مَا مَلَكَتْ أَيْمَانُهُنَّ أَوِ التَّابِعِينَ غَيْرِ أُولِي الْإِرْبَةِ مِنَ الرِّجَالِ أَوِ الطِّفْلِ الَّذِينَ لَمْ يَظْهَرُوا عَلَىٰ عَوْرَاتِ النِّسَاءِ

«Biraq erlerine, ákelerine, qaıyn atalaryna, óz uldaryna, ógeı uldaryna, aǵa-baýyrlaryna, olardyń uldaryna, ápke-sińlileriniń uldaryna, Musylman áıelderge, qoldaryndaǵy kúńderine, áıel kerek qylmaıtyn qyzmetshilerge nemese áıelderdiń uıatty jerlerin bilmeıtin balalarǵa sulýlyqtaryn kórsetýlerine bolady»[1], – degen.

Bul aıattaǵy «sulýlyq» dep áıeldiń kúndelikti sharýada ashyp júretin, aýyr áýretke sanalmaıtyn jerleri meńzelgen. Iaǵnı, áıel adam joǵaryda atalyp ótken adamdardyń aldynda, (onyń ishinde qaınatanyń) aldynda bas, shash, bet, moıyn, alqam, ıyq, qol jáne tizeden tómengi jerlerdi ashýǵa bolady[2]. Alaıda, olardyń aldynda ish, arqa jáne kindikten tizege deıingi aýyr áýret bolyp sanalatyn jerlerdi ashýǵa bolmaıdy.

Toqeteri: qaınatańyzdyń aldynda oramal taǵýyńyz mindetti emes.

Sáttilik ıesi Alla ǵana.

Aıbek Ábdiqadyr
Muslim.kz saıtynyń dinı sarapshysy