Aqyry úılenem ǵoı degen qyzben toıǵa deıin jaqyndassam bola ma?

Assalam aleıkým. Júrip júrgen qyzym bar edi. Onymen úılenetin ýaqytymyzdy da belgilep qoıdyq. Endi úılenetinimiz naqtylanǵannan keıin onymen jaqyndasa berýime bola ma? Sharıǵat buǵan ruqsat bere me?

Ответ

Ýa aleıkým assalam. Islam sharıǵatynda er men áıel arasyndaǵy jaqyndasý tek neke qıylǵannan keıin ǵana bastalady. Oǵan deıingi kezeńderde er men áıeldiń arasy bóten adamdar retinde qala beredi. Úılenetin ýaqytty belgileý – qyzben jaqyndasýǵa sebep bola almaıdy.

Úılenem deýshi adam sharıǵat boıynsha qyzdyń tek júzine, bilezikke deıingi eki qoly men tobyqqa deıingi aıaqtaryna ǵana qaraı alady. Fıqh ǵalymdarynyń bul máseledegi sózderin tizbektegen sheıh Ýahba Zýhaılı: «Kópshilik fıqh ǵalymdarynyń kózqarasynda sóz salýshy adam sóz salynǵan qyzdyń júzine jáne eki alaqanyna ǵana qaraýyna bolady. Sebebi bul ekeýi qyzdyń sulýlyǵy men dene bitiminen tolyq habar beredi... sonymen qatar Abý Hanıfa tobyqqa deıingi eki aıaǵyna qaraýdy da ruqsat kórgen»[1], – deıdi.

Toqeteri: úılenemiz dep ýádelesken adam nekelerińiz qıylǵansha bóten bolyp qala bermek. Jaqyndasý nekeden keıin ǵana ruqsat etiledi. Nekege deıingi jaqyndasý – zına, zına bolsa, óz kezeginde kúná. 

Alla sabyrlyq berip, júzińizdi qurmetinen aıyrmasyn.

Aıbek Ábdiqadyr
Muslim.kz saıtynyń dinı sarapshysy