Názir (ataý) jasaǵannan keıin ornyna basqa nárse berýge bola ma?

Assalam aleıkým. Alla úshin názir jasaǵannan keıin ornyna basqa nárse nemese qunyn berýge bola ma? Buny surap jatqanym, bir jaqynymyz qatty aýyryp jatqanynda bir jyldyq toqtyny názir jasaǵan bolatyn. Keıin jazylǵannan keıin sol toqtyny soımaq bolǵanda, nemeresi ony «meniń qoıym, tıme» dep shyr-pyr boldy. Al, qazir onyń ornyna basqa bir qoshqardy soısa, nemese qunyn shyǵarsa bola ma eken dep júr edi. Aldyn ala rahmet.  Ádilet K.

Ответ

Ýa aleıkým assalam. Názir jasaǵan adam názirin oryndaýy kerek. Bunyń úkimi – ýájip.

Degenmen, suraqta aıtylǵandaı jaǵdaı bolyp, názir jasaǵan adam názir ornyna odan da jaqsyraq nárse shyǵaramyn dese nemese qunyn shyǵarý kóbirek paıdaly bolady dese, onda názir ıesiniń bul amaly oryndy. Ǵalymdarymyz bul syndy isti qup kórgen. Mysalǵa, Imam Muhammad Shaıbanı: «Eger maldarynyń ishinen bir qoıdy qurbandyqqa atasa, ornyna onyń qunyn shyǵarýyna bolady»[1], – deıdi.

Imam Sarahsı aıtady: «Eger kimde-kim «qurbandyqqa qoı shalýǵa názir ettim» dep, qoı ornyna túıe soısa, onda onyń bul náziri oryndalǵan bolyp esepteledi, tipti talap etilgeninen de artyq jasaǵan bolyp esepteledi. Sebebi, ol ózine ýájip bolǵan nárseni artyǵymen oryndady. Óıtkeni, bir túıe jeti qoıdyń ornyna júredi. Demek, jeti adamnyń názirin óteýge bolady. Ol adam ýájip bolǵan názirdi oryndady, qosymshasyn da shyǵardy. Budan shyǵatyny: eger kimde-kim ataǵan nársesine (názirine) teń keletin nemese odan da jaqsyraǵyn nemese sonyń qunyn shyǵarsa, onyń bul amaly jaıyz (ruqsat etilgen) bolyp tabylady».[2]

Osy aıtylǵandardy eskere kelip, jaqynyńyz qalasa, názirin óteý úshin qoı ornyna qoshqaryn, qalasa qunyn da shyǵarýyna bolady.

Eń durysy Allaǵa málim!

Aıbek Ábdiqadyr
Muslim.kz saıtynyń dinı sarapshysy