Jeti shelpek taratý durys pa?

Jeti shelpek taratý durys pa? Ol sharıǵatta bar ma?

Ответ

«Jeti shelpek pisirý» úrdisiniń bizdiń qazaq dástúrine qaıdan qalyptasqany, qandaı nanymnan týyndaǵany jaıynda aıtylǵan naqty derek kezdestirmedik. Biraq, bizdiń túsinigimizshe, jeti shelpek taratý úrdisiniń astarynda – árýaqtyń atynan elge tamaq berip, saýabyn ólige baǵyshtaý túsinigi jatyr.

Osy turǵydan qaraǵanda onyń sharıǵatqa teristigi joq. Sebebi, jasalǵan jaqsy amaldyń saýabyn ólgen kisige baǵyshtaý – sharıǵatymyzda da bar.

Endi ony nege jeti degen? Sandardyń arasynda «7» sanyn erekshe tańdalyp alynýy da beker emes (jeti shelpek). Óıtkeni, dinimizde jeti sanymen baılanysa aıtylǵan úkimder kóp. Mysaly, ımannyń jeti sharty, jeti ret qaǵbany taýaf etý, ıt jalaǵan jerdi jeti ret jýý. Shelpektiń «jeti» sanymen baılanystyrylýynyń máni de osynda jatsa kerek.

Qalaı bolǵanda da, jeti shelpekti taratý úrdisin dinge teris deý nemese shırkke alyp barar jol deý qıyn. Nege deseńiz, jeti shelpek taratqan adam árýaqtan medet tilep emes, o dúnıedegi ólgen kisige saýaby jáne paıdasy tısin dep taratady. Onyń ústine, qazirgi kezde shelpek qazaqtyń ulttyq taǵamynyń biri retinde qalyptasqan. Eń durysy – Allaǵa málim!

Baýyrjan Ábdýáli,

 QMDB sharıǵat jáne pátýa bóliminiń mamany