Altyn tis saldyrýǵa bola ma?

Assalaýmaǵaleıkým! Tisimdi emdetip jatyr em, sizderden suraıyn degenim, altyn tis saldyrý sharıǵatqa qaıshy emes pe?

Ответ

Ýaǵaleıkýmassalam!

Jalpy alǵanda, er kisilerge altyndy áshekeı retinde taǵýǵa ruqsat etilmeıdi. Áıel kisilerdiń altyn buıymdaryn qoldanýlaryna ruqsat. Alla elshisi (oǵan Allanyń salaýaty men sálemi bolsyn) bylaı dedi:

اِنَّ اللَّهَ عَزَّ وَجَلَّ أَحَلَّ لِإِنَاثِ أُمَّتِي الْحَرِيرَ وَالذَّهَبَ وَحَرَّمَهُ عَلَى ذُكُورِهَا

Alla Taǵala úmmettimniń  ishindegi áıel zatyna jibek pen altyndy adal etip, al er zatyna aram etti[1].

Týra solaı er bolsyn, áıel bolsyn altyn nemese kúmisten jasalǵan ydystardan as, sýsyn ishýge dinimizde tyıym salynady.

Altyndy tek asa qajet jaǵdaılarda denemizge engizýge bolady. Altyn tis salý da buǵan kiredi. Bul máselege Ǵarfaja ıbn Asǵad atty sahabanyń keltirgen myna deregi negiz retinde alynady:

أصيب أنفي يوم الكلاب في الجاهلية فاتخذت أنفاً من ورق فأنتن علي، فأمرني رسول الله صلى الله عليه وسلم أن أتخذ أنفاً من ذهب

«Jahılıet (Islamǵa deıin nadandyq jaıylǵan) dáýirinde «Kılıab» atty shaıqas kúni murynymnan aıyryldym. Sóıtip kúmisten ózime muryn jasap aldym. Ýaqyt óte kele kúmis murynym ıistenip, Alla elshisi (oǵan Allanyń salaýaty men sálemi bolsyn) maǵan altynnan muryn jasaýǵa buıyrdy)»[2].

Kópshilik ǵulamalarymyz qajetti jaǵdaılarda altyndy qoldaný durys bolatynyn aıtady. Altynnan belbeý, tis jasatýǵa ruqsat. Sebebi, kúmis tis jaǵymsyz ıis shyǵarady[3]. Al altynǵa eshqandaı muqtajdyq týmaı, tek tisti kórkemdeý maqsatynda ornatýǵa ruqsat etilmeıdi. Durysy Allaǵa málim.

Darhanuly Tamırlan
Nur-Sultan qalasynyń pátýaǵa jaýapty mamany

Автор: Muslim.kz порталы