Dıplomdy satyp alýǵa bola ma?

Ássálámýaǵaleıkým! Men 2-kýrstyń aıaǵynda oqýdan shyǵyp ketken bolatynmyn. Barlyǵyna kináli ózim. Oqýdy qaıta jalǵastyrý úshin 3 jyl oqý kerek. Al, bıyl dıplom alatyn jylym edi. Men oqymaǵan jyldarymnyń aqshasyn tólep, dıplomdy satyp alsam bola ma? Qaıta oqyǵym kelmeıdi. Ne isteýge bolady? Meıramǵalı

Ответ

Ýa aleıkým assalam!

Dıplomdy satyp alý – ótirik aıtý jáne jalǵan kýálik bergenmen birdeı. Al, bul – úlken kúná. Quran Kárimde: «...Sondaı-aq, ótirik sózderden saqtanyńdar[1]», – dep ámir etilgen.

Ábý Bákir (r.a.) ózi kýá bolǵan bir oqıǵany bylaısha sýretteıdi: «Senderge eń úlken kúnálardy aıtaıyn ba?» – dep paıǵambar (s.ǵ.s.) úsh ret surady. Biz: «Iá, Alla elshisi!», – dedik. Paıǵambar (s.ǵ.s.): «Alla Taǵalaǵa serik qosý jáne ata-anany renjitý», – dedi. Paıǵambar (s.ǵ.s.) súıenip otyrǵan edi, ol boıyn tiktep: «Ótirik sóz, jalǵan kýálik», – dep qaıta-qaıta aıta berdi. Biz: «Endi toqtasa bolar edi», – dep oıladyq[2]».

Qoryta aıtqanda, dıplomdy satyp alý, sol arqyly jumysqa turý – kúná. Osylaısha tabys tabý – sharıǵatta tyıym salynady. Paıǵambarymyz (s.ǵ.s.): «Kimde-kim aldasa (alaıaqtyq etse), bizden emes[3]», – degen.

Dıplomdy bilim alý arqyly ıelený qajet. Bul qujat erteń sol mamandyq ıesi jáne onyń asyrap otyrǵan bala-shaǵasynyń nesibesi adal bolýyna sebepshi.

Rýslan Kambarov

[1] Haj súresi, 30-aıat
[2] Buharı, Mýslım
[3] Mýslım