Bir otbasyǵa bir qurbandyq jete me?

Assalaýmaǵaleıkým! Meniń qurbandyqqa qatysty suraǵym bar edi. Qurbandyqty ár adam óz atynan shalý kerek ekenin bilemin. Al, otbasynyń barlyq músheleri atynan dep bir ǵana adam qurbandyq shala alady ma? Turmys qurmaǵan otbasy músheleriniń  atynan ákesi shala alady ma? Osy suraqqa jaýap berseńizder. Aınur.

Ответ

Ýaǵaleıkýmýssalam!

Aınur, Hanafı mázhaby boıynsha tómendegi talaptarǵa saı keletin ár adamǵa qurbandyq shalý ýájip:

• Musylman  bolýy kerek
• Turǵylyqty (jolaýshy bolmaý)
• Aqyl-esi durys
• Balıǵatqa tolǵan  
• Baqýatty[1]. (Negizgi qajetterden tys nısap mólsherindegi qarjyǵa ıe bolý. Nısap mólsheri – 85 gramm altyn nemese osy qunǵa teń keletin artyq múlikke ıe bolý).

Bul degenimiz, bir otbasydaǵy kámeletke tolǵan, aqyl-esi durys jáne de óziniń jeke baılyǵy bar ul-qyzdary men óziniń jeke baılyǵy bar zaıyby da óz aldyna bir qoı qurbandyq shalýy tıis. Ákesiniń shalǵan qurbandyǵy olarǵa júrmeıdi.

Biraq, óz dúnıeleri bolmasa, otaǵasynyń shalǵan qurbanynyń saýaby olarǵa da jazylady. Sebebi, ardaqty Paıǵambarymyz (s.ǵ.s.) shalǵan qurbanynyń saýabyn úmbetimen de bólisetindigi rıýaıat etiledi. Sahaba Jábir ıbn Abdýlla bylaı deıdi: «Paıǵambarymyzben birge qurban aıt namazyn oqydym. Ol (s.ǵ.s.) namazdan shyǵyp, bir qoshqar alyp keldi. Ony qurbandyqqa shalyp jatyp: «Bısmılláhı Allahý ákbár. Ýa Rabbym! Bul (qurbandyq) meniń jáne úmbetimniń ishinen qurbandyq shala almaǵandar atynan», – dedi»[2]. 

[1] Ibn Ǵabıdın, ál-Hádııa – 162 bet.
[2] Ahmád -14423

Abdýsamat Qasym