Araq ishkenniń 40 kún namazy qabyl bolmaı ma?
Assalaýmaǵaleıkým! Araq ishiletin orynda otyrsań, 40 kúndik namazyń qabyl bolmaıdy degen ras pa? Sonda qonaqqa barýǵa bolmaı ma? Aıjan Magden
Ответ
Ýaǵaleıkým assalam!
Araq ishken jannyń 40 kún boıy namazy qabyl bolmaıtyndyǵy jaıly Abdýlla bın Omar (r.a.) bylaı dep rıýaıat etedi: «Kimde-kim araq ishse, Alla Taǵala onyń qyryq kún namazyn qabyl etpeıdi. Eger táýbe etse, Alla ony keshiredi. Al, qaıta araq ishse, Alla Taǵala onyń qyryq kún namazyn qabyl etpeıdi. Eger táýbe etse, Alla ony keshiredi. Eger qaıta araq ishse, Alla Taǵala onyń qyryq kún namazyn qabyl etpeıdi. Táýbe etse, Alla ony keshiredi. Tórtinshi ret araq ishse, Alla Taǵala onyń qyryq kún namazyn qabyl etpeıdi. Táýbe etse, táýbesin de qabyl etpeıdi. Oǵan Habal ózeninen ishkizedi», – dedi. Adamdar: «Ýa, Ábdýrahman ákesi! Habal ózeni degen ne?» – dep suraıdy. «Tozaqtyqtar irińinen paıda bolǵan ózen», – dedi[1]».
Imam án-Naýaýı (r.a.): «Rasynda, ár qulshylyqqa eki jaqtama qaralady. Birinshisi oryndaýshynyń paryzyn óteýi bolsa, ekinshisi – saýapqa kenelýi. Hadıste «namaz qabyl bolmaıdy» dep saýaby bolmaıtyndyǵyn aıtýda», – dep túsindirgen.
Araq-sharap qoıylǵan orynda otyrýǵa bolmaıdy. Bul jaıynda Paıǵambarymyzdyń (s.ǵ.s.) sahabalarynyń biri Omar ıbn Hattab (r.a.) mynadaı sóz estigenin jetkizedi: «Kimde-kim Allaǵa jáne aqyret kúnine ıman keltirse, araq qoıylǵan dastarqanǵa otyrmasyn[2]».
Musylman jan osy sekildi tyıym salynǵan is-áreketti kórse, ony toqtatýy – paryz. Al, shamasy kelmeıtin bolsa, ózi ondaı jerden ketýi qajet.
Birde «ádil halıfa» dep tanylǵan Omar bın Abdýlazızdiń (r.a.) aldyna araq iship ustalǵandardy alyp keledi. Aıyptylarǵa dúre soǵýǵa buıyrylady. Alyp kelgen saqshylar: «Myna pálensheniń aýzy berik eken», – dep, aralaryndaǵy bireýdiń ishpegenin aıtady. Sonda halıfa: «Dúre soǵýdy sol aýzy berik adamnan bastańdar. Sender Quran Kárimde: «Anyǵynda, Ol senderge Kitapta: «Allanyń aıattaryna qarsy kelip, keleke etkenin estigenderińde, budan basqa sózge aýyspaıynsha, olarmen birge otyrmańdar, áıtpese, sender de sondaı bolasyńdar», – dep úkim túsirdi...[3]», – degen aıatyn bilmeısińder me?» – dep, ishpese de, sol jerde bolǵandyqtan jazalaýǵa buıyrǵan eken.
