Saparda eki namazdy qosyp óteýge bola ma?

Suraq: Saparda besin men ekinti namazyn qosyp óteýge bola ma?

Ответ

Jaýap: Hanafı boıynsha eki namazdy qosyp oqý tek qajylyq kezinde, Arafa men Mýzdalıfada ǵana ruqsat etiledi. Saparda, turǵylyqty kezde eki namazdy biriktirip bir ýaqytta oqýǵa bolmaıdy[1]. Óıtkeni, ár namazdy óz ýaqytysynda oqý paryz. Ol jaıly Alla Taǵala Quranda bylaı deıdi:

إِنَّ الصَّلاةَ كَانَتْ عَلَى الْمُؤْمِنِينَ كِتَابًا مَوْقُوتًا

«Rasynda, namaz múminderge belgili ýaqytta paryz etildi»[2]. Al, hadıstegi Paıǵambarymyzdyń (oǵan Allanyń salaýaty men sálemi bolsyn) saparda eki namazdy qosyp oqydy degenniń maǵynasy: birinshi (besin nemese sham) namazyn aqyrǵy ýaqytyna keshiktirip baryp oqıdy da ekinshisin (ekinti nemese quptan) áýelgi ýaqytysynda óteıdi[3]. Oǵan dálel: Aısha (oǵan Alla razy bolsyn) anamyz bylaı deıdi: «Paıǵambarymyz (oǵan Allanyń salaýaty men sálemi bolsyn) saparda besindi keshiktirip ekinti namazyn alǵashqy ýaqytynda jáne shamdy keshiktirip quptandy áýelgi ýaqytysynda oqydy»[4].

Nafıǵ jáne Abdýlla ıbn Ýaqıdtan jetken habarda bylaı delingen: Ibn Omardyń (ol ekeýinen Alla razy bolsyn) azanshysy: «Namaz oqımyz ba? - degende, Ol: – Júre ber, - dedi. Tipti shapaqtyń ketýine az ǵana ýaqyt qalǵanda (kóliginen) túsip shamdy oqydy. Keıin kishkene kútip shapaq ketkende quptandy oqydy. Sosyn bylaı dedi: Rasynda, Paıǵambarymyz (oǵan Allanyń salaýaty men sálemi bolsyn) bir jerge asyǵyp tursa, men qalaı istegen bolsam solaı isteıtin edi...»[5]

fatua.kz

[1] Maýsýlı, «ál-Ihtııar lı taǵlılı ál-mýhtar» 1/136-137

[2] «Nısa» súresi, 103-aıat

[3] Asǵad ás-Saǵýrjı, «ál-Fıqhý ál-Hanafııý ýá ádıllátýhý», 1/143

[4] Tahaýı, Ahmad, Hákim rıýaıat etken, ısnady hasan

[5] Ábý Dáýit rıýaıaty, 1212