Saýaby men kúnási teń tússe, qaıda barady?

Assalaýmaǵaleıkým! Meniń bir aǵam mynadaı suraq qoıdy. Ol: «Meniń saýabym men kúná isterim tarazyǵa tartylǵanda birdeı bolsa, men qaı jaqqa túsem», – deıdi. Nursultan Arystanbaev

Ответ

Ýa aleıkým assalam!

Quran Kárimde saýaby men kúnási teń túsken musylmandar jaıy: «Ol eki toptyń arasynda bóget bar. Aǵraftyń ústinde árqaısysyn (jánnattyq pen tozaqtyqtardy) belgisinen tanıtyn adamdar bar. Olar jánnattyqtarǵa: «Senderge amandyq bolsyn!», – dep ún qatady. Olar oǵan (jánnatqa) kirmegen, (jánnatty) úmit etedi»,[1] – dep baıandalǵan.

Hýzaıfa, Ibn Abbas, Ibn Masǵud (r.a.) jáne taǵy basqa sahabalar saýaby men kúnási teń kelgen adamdar basqalardyń esep-qısaby bitkenshe Aǵrafta turatyndyǵyn rıýaıat etken. Aǵraf – jánnat pen tozaq ortasyndaǵy bıik qorǵan. Ibn Jarır Hýzaıfa (r.a.) myna rıýaıatty jetkizgen: «Aǵraf ıeleri – saýap jáne kúná amaldary teń túskender. Olardyń kúnálary jánnatqa kirýge kedergi bolǵan, al saýaptary tozaqqa kirgizbeı ustap turǵan jandar. Olar aǵraf qorǵanynda Alla Taǵala basqalarǵa tórelik etip bolǵansha turady»[2].

Túıindeı aıtqanda, adamzat jánnat pen tozaqqa bólingen soń, Alla Taǵala aǵraf ıelerin Óz keńshiligi jáne meıirimimen jánnatqa kirgizedi[3].

[1] Aǵraf súresi, 46-aıat
[2] Ibn Kasır, 2-tom, 25-bet
[3] Alam Ahır, 254-bet