Kúndelikti qandaı duǵa oqýǵa keńes beresiz?
Assalamý aleıkým, saıt ujymy!
Kúndelikti qoǵamdaǵy tirshilik jan dúnıeniń azyǵyn umyttyryp jiberedi eken. Imanyma dem beretin, ár kúni oqyp júretin bir duǵa úıretýińizdi suraımyn.
Ответ
Ýa aleıkým assalam!
Árıne, kúndelikti oqylatyn aıat jáne duǵalar óte kóp. Olardy bólip-jarýǵa bolmaıdy. Degenmen, tilge jeńilirek hám maǵynasy aýqymdy qyssha duǵalardyń birin usynamyz. Ábý Hýraıra (r.a.) rıýaıat etken hadıste: «Kimde-kim: «Lá ıláhá ıllá Allahý, ýahdahý lá shárıká láh, láhýl-mýlký ýá láhýl-hamdý, ýá hýá álá kýllı sháıın Qodır»,-dep kúnine júz ret aıtsa, on quldy azat etkenmen teń bolady. Jáne de oǵan júz saýap jazylyp, júz jamandyǵy óshiriledi. Jáne (duǵasy) sol kúni kesh batqansha shaıtannan qorǵan bolmaq. Eshkim budan abzal sóz aıta almaıdy. Tek odan kóbirek aıtqan adam bolmasa[1]»,-degen.
Duǵanyń maǵynasy: «Alladan basqa Táńir joq. Ol Jalǵyz jáne Onyń serigi joq. Barlyq ıelik Oniki jáne barlyq maqtaý Oǵan tán. Ári Ol barlyq nársege Qudiretti».
Bul eń ońaı oryndalatyn súnnet. Sonymen birge, ardaqty Paıǵambarymyz (s.ǵ.s.) bul sózderdiń eń abzaly degen. Abdýlla bın Amr bın As (r.a.) rıýaıat etken hadıste: «Men jáne menen aldyńǵy paıǵambarlar aıtqan eń jaqsy sóz: «Lá ıláhá ıllá Allahý, ýahdahý lá shárıká láh, láhýl-mýlký ýá láhýl-hamdý, ýá hýá álá kýllı sháıın Qodır[2]»,-delingen.
Rasynda da, bul duǵa oqýshynyń ımanyn kúsheıtedi. Al, adam ımanyn qýattaıtyn sóz eń jaqsy sóz bolary anyq.
Bul, duǵany, hadıste aıtylǵandaı, kúndelikti 100 ret aıtýǵa shamamen 10 mınýt ýaqyt qana jumsalady. Bul sózderdi qoǵamdyq kólikten turyp, kóshede júrip bara jatyp-aq, tipti, sharýańyzben aınalysyp júrip te aıtýǵa bolady.
