Jyn shyǵaramyn dep naýqasty óltirip alǵan baqsy qamaýdan bosady
Almaty oblysynda baqsynyń eminen keıin kóz jumǵan 28 jastaǵy Turar Orazalıevtiń týystary emshige qarsy is qozǵalǵanyna qarsy shyqty. Dástúrli medıtsınadan shıpa bolmaǵandyqtan, aqyl-esiniń aýytqýynan úsh jyldaı qınalǵan jigitti jaqyndary baqsyǵa óz erkimen ákelipti. Alaıda, naýqas 4 kún buryn belgisiz jaǵdaıda qaıtys boldy, dep habarlady «Almaty» arnasy.
Polıtsııa dereginshe, Shamalǵan aýylynyń turǵyny aýyr dene jaraqatynan kóz jumǵan. Alaıda emshi jigittiń denesindegi jaraqattardy buryn da baıqaǵanyn aıtady.
«Muny Allanyń buıryǵyna, taǵdyrdyń jazýyna qaldyraıyq. Jaqsylyq emes, árıne. Men qazir kinálimin de. Eki jyldan tórt jylǵa deıin shartty jaza alýym múmkin, bolmasa odan da aýyr jaza alarmyn» deıdi emshiniń ózi.
63 jasynda jyn kirgen jandy emdeımin dep basy daýǵa qalǵan Ábdikárim aqsaqal qusbegilikpen aınalysady eken, birneshe kún qamalǵan soń, qolhatpen bostandyqqa shyǵypty.
«Tynyshtalmaı, basyn qabyrǵaǵa soqty, biraq kúdikke ilingenime ókinbeımin. Aýyrǵan jandy jaqyndary baılap ákelip, jarty saǵat em salǵan soń, alyp ketetin. Jetinshi kúnge qaraǵanda esin jınap, jaqsaryp qalǵan edi» deıdi qusbegi.
Al, jigittiń týystary Turardy úıde baılap ustaǵandaryn, ol óziniń saýsaǵyn da shapqanyn, kóliktiń astyna da júgirgenin baıandady.
«Jatqan kezde aýzyma bir nárse kirip ketti dedi. Sodan qarańǵy bólmege qarap, qasha beretin boldy. Qatarǵa qosylmaıtyn boldy. Bireýler jyn dedi, bireýler dýalaǵan dedi. Bir túrli bolyp ketti», – dedi marqumnyń aǵasy Amantaı.
Jigitti jaqyndary Talǵardaǵy júıke aýrýlary aýrýhanasyna da jatqyzǵan. Marqumnyń týystary medıtsınadan medet tappaǵan soń, baýyrlaryn qyryqtan astam emshi men moldaǵa aparyp emdetken.
«Búrkitshi kináli emes, taǵdyry solaı boldy. Sondyqtan aldaǵy ýaqytta sońǵy ret aparyp emdetken baqsyny sotta barynsha aqtap alýǵa tyrysamyz, oǵan ókpe, renishimiz joq», – deıdi olar.
