JYLDYQ ESEP – 2025: 450 KÁSIPORYN JAŃADAN HALAL SERTIFIKATYN ALDY
2025 jyly «QMDB HALAL» standarty boıynsha 450 kásiporyn jańadan sertıfıkattaldy. Búgingi tańda respýblıka aýmaǵynda jáne shetelderde jalpy sany 2234 kásiporyn halal ónim óndirýmen aınalysýda.
Qazaqstan musylmandary dinı basqarmasynyń negizgi baǵyttarynyń biri – halal salasyn damytý. Halal júıesi sharıǵat talaptaryna saı otandyq kásipkerlikti qoldap, ulttyq Ekonomıkany nyǵaıtýdyń mańyzdy tetigi bolyp tabylady. Osy baǵytta qyzmet atqaratyn Halal Damý mekemesiniń «QMDB HALAL» sertıfıkatyna ıe kásiporyndar ishki naryqpen qatar, halyqaralyq deńgeıde de belsendi jumys júrgizip keledi.
Halyqaralyq yntymaqtastyq aıasynda Ózbekstan, Qyrǵyzstan, Reseı, Qytaı jáne Iran memleketterine «QMDB HALAL» sertıfıkatymen 10 myń tonnaǵa jýyq halal ónim Eksporttaldy.
«Aıtýly sharalar – 2025» jospary aıasynda Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanulynyń bastamasymen besinshi ret uıymdastyrylǵan halyqaralyq «HALAL EXPO–2025» kórmesi Almaty qalasynda ótti. Aýqymdy is-sharaǵa otandyq jáne sheteldik 100-ge jýyq kásiporyn qatysyp, eki kún ishinde 20 myńnan astam kelýshi halal ónim túrlerimen tanysyp, saýda jasady.
Kórme barysynda tutynýshylarǵa 9 tonna sút ónimderi, 5 tonna et ónimderi, 4 tonna qus eti, 8 tonnaǵa jýyq kondıterlik ónimder, 5 tonnaǵa jýyq shujyq ónimderi, 3 tonnadan astam jartylaı fabrıkattar, 4 tonnaǵa jýyq sýsyndar (kofe, shaı, sıroptar), 2 tonnaǵa jýyq emdik-profılaktıkalyq ónimder jáne 1 tonnadan astam fast-fýd ónimderi usynyldy.
