JYLDYQ ESEP–2025: 218 DINI ÁDEBIET SARAPTAMADAN ÓTTI
Qazaqstan musylmandary dinı basqarmasynyń qurylymyndaǵy Dinı saraptama bólimi 2025 jyly dinı ádebıetterdiń mazmunyn zerdeleý, sharıǵat talaptary men dástúrli ıslam qaǵıdattaryna sáıkestigin anyqtaý, sondaı-aq qoǵamnyń dinı qaýipsizdigin qamtamasyz etý baǵytynda keshendi jáne júıeli jumystar júrgizdi.
Atap aıtqanda, eseptik kezeńde dinı ádebıetterge qatysty 218 ótinish qabyldandy. Onyń ishinde 163 ótinish elimizdegi azamattardan, al 56 ótinish shetelde bilim alyp jatqan Qazaqstan azamattarynan kelip tústi.
Saraptamaǵa usynylǵan 218 kitaptyń 213-ine oń qorytyndy berilip, 2 kitapqa teris qorytyndy shyǵaryldy. Sonymen qatar 3 kitapqa mazmundyq túzetý engizý usynyldy.
Mysyr, Túrkııa, Iordanııa, Saýd Arabııasy Koroldigi, Qyrǵyzstan jáne Reseı Federatsııasy sekildi memleketterden ákelingen 11 395 dana dinı ádebıetke qatysty 56 ótinish qabyldanyp, komıssııa saraptaýynan ótti. Onyń ishinde 9 000-nan astamy Quran Kárim, al 2 000-ǵa jýyǵy túrli taqyryptaǵy dinı ádebıetterdi qurady.
Qazaqstan aýmaǵynda múftııatqa qarasty meshit janyndaǵy 122 dinı dúkenge saraptama júrgizilip, 3 000-ǵa jýyq dinı ádebıet tekseristen ótkizildi. Sonymen qatar respýblıka kóleminde 328 namazhana, 59 túzeý mekemesi, 9 medrese, 22 qarılar daıarlaý medresesi jáne meshitterdegi kitap sóreleri josparly túrde tekserildi. Nátıjesinde teris aǵymdy nasıhattaıtyn dinı ádebıetter tirkelgen joq.
2025 jyldyń maýsym aıynda Dinı saraptama bóliminiń uıymdastyrýymen, Bas múftı Naýryzbaı qajy Taǵanuly hazirettiń qatysýymen jáne QR Din isteri komıtetiniń Dinı saraptama basqarmasymen birlesip, tájirıbe almasý maqsatynda «Dinı ádebıetterdi saraptaý jáne aqparattyq qaýipsizdikti qamtamasyz etý» taqyrybynda eki kúndik semınar ótkizildi.
Sondaı-aq QR Din isteri komıtetiniń Dinı saraptama basqarmasymen onlaın formatta turaqty aqparattyq tájirıbe almasý jolǵa qoıylǵan. Dinı saraptama bólimi óńirlerdegi jaýapty mamandar úshin ár toqsan saıyn onlaın semınarlar uıymdastyryp keledi.
Óńirlerdegi jaýapty mamandar bekitilgen tapsyrmaǵa sáıkes aı saıyn tómendegi mekemelerge tekseris júrgizip, toqsandyq esepterin ýaqtyly tapsyryp otyr:
Meshit janyndaǵy dinı dúkender;
Meshit sórelerindegi dinı ádebıetter;
Namazhanalardaǵy kitaptar;
Medreselerdiń kitaphanalary;
Túzeý mekemelerindegi dinı ádebıetter;
Saýat ashý kýrstaryndaǵy oqý quraldary;
Qarılar daıarlaý ortalyqtaryndaǵy kitaptar.
