«Jeti rýhanı qazyq» shamshyraq ispetti – Naýryzbaı qajy Taǵanuly
QMDB Tóraǵasynyń birinshi orynbasary, naıb múftı, Nur-Sultan qalasynyń bas ımamy Naýryzbaı qajy Taǵanuly III respýblıkalyq ımamdar forýmynda qabyldanǵan qujattar rýhanı saladaǵy shamshyraq ispetti ekenin atap ótti.
«Elimizdegi jáne alys-jaqyn shetelderdegi din qyzmetkerleriniń basyn qosqan aıtýly jıyn buǵan deıin Elorda tórinde eki márte ótken bolatyn. Osy basqosýlar barysynda Dinı basqarma jumysyna qajetti kóptegen tarıhı qujattar qabyldanǵan edi. Qazirgi tańda atalmysh qujattar QMDB-nyń san-salaly jumysyna oń áserin berýde.
Bul tarıhı qujattardyń Dinı basqarma jumysyn júıelep qana qoımaı, elimizdegi barlyq meshitter qyzmetin jandandyrýǵa septigin tıgizip jatqanyn aıryqsha atap ótý kerek. Sol qujattardyń tarıhı jalǵasy retinde jaqynda ǵana qabyldanǵan «Jeti rýhanı qazyq» Tuǵyrnamasy men «Dinı rásimder men dinı laýazymdar tizilimi» dinı sala jumysyna birizdilik engizip, kúlli qazaq dalasynda ortaq qulshylyq qaǵıdalaryn qalyptastyrýǵa yqpal etpek. Elimizdegi dinı laýazymdar júıesin naqtylap, ár mamannyń atqaratyn qyzmet túrin taıǵa tańba basqandaı anyq etip bekitý – ıgi bastama.
Al, III Imamdar forýmynyń basty qujaty – Qazaqstan musylmandarynyń «Jeti rýhanı qazyǵy» el ıgiligi jolynda jasalǵan qutty qadam ekeni sózsiz. Beıbitshilik pen birlikti tý etken, izgilik pen meıirimdilik tunǵan qoǵam qalyptastyrý – aldymen adam balasynyń boıynda izgi qasıetterdi oıatýdan bastalady. Osy oraıda, Qazaqstan musylmandary dinı basqarmasy «Jeti rýhanı qazyq» qujatyn qabyldaı otyryp, el erteńi úshin, ıgilikti qoǵam bolashaǵy úshin amanat arqalap otyr. Bul amanat – elimizdegi árbir din qyzmetkeriniń jamaǵat arasynda jaqsylyq shýaǵyn jaıyp, kórkem is-áreketimen kópke úlgi-ónege bolýyna mindetteıdi. Alla Taǵala osy izgi jolda barshamyzǵa kúsh-qýat násip etkeı! Ámın!» – dedi Naýryzbaı qajy Taǵanuly.
