JASTAR ISI SEKTORYNYŃ JETEKShISI MEShIT JASTARYNA NASIHAT AITTY
Astana qalasy Jastar isi sektorynyń jetekshisi, «Áziret Sultan» meshitiniń ustazy Shalqar Joldy «Ál-Farabı» meshitinde jastarǵa arnap «Nashaqorlyq – qurdymǵa ketiredi» taqyrybynda ýaǵyz-nasıhat aıtty.
Kezdesýde esirtkige táýeldiliktiń adam ómirine, otbasyna jáne qoǵamǵa tıgizetin keri áseri sóz boldy. Ustaz jastardy óz densaýlyǵy men bolashaǵyna jaýapkershilikpen qaraýǵa, zııandy ádetterden aýlaq bolýǵa úndedi.
Sondaı-aq jastar arasynda salaýatty ómir saltyn qalyptastyrýdyń, bos ýaqytty tıimdi ótkizýdiń jáne jaqsy orta tańdaýdyń mańyzy túsindirildi. Shalqar Joldy adamdy teris jolǵa jeteleıtin ádetterdiń alǵashynda eleýsiz kóringenimen, onyń sońy orny tolmas ókinishke ákelýi múmkin ekenin aıtyp, árbir qadamǵa baıyppen qaraýǵa shaqyrdy.
Ýaǵyz barysynda jastardyń dinı jáne rýhanı saýatyn arttyrý, jaman ádetterden saqtaný, ata-ana men qoǵam aldyndaǵy jaýapkershilikti seziný máselelerine de toqtaldy.
Kezdesý sońynda jastar ózderin qyzyqtyrǵan suraqtaryn qoıyp, ustazdan jaýap aldy.
