JASTAR ISI SEKTORYNYŃ JETEKShISI DÓŃGELEK ÚSTELGE QATYSTY

Elordada «QAMQOR-ASTANA» qoǵamdyq qorynyń uıymdastyrýymen, Astana qalasynyń Din isteri jónindegi basqarmasynyń qoldaýymen «Naýryznama-2026» onkúndigi aıasynda «Kórisý kúni – ulttyq dástúr men rýhanı kelisimniń jalǵasy» taqyrybynda dóńgelek ústel ótti.

Atalǵan is-sharaǵa Astana qalasy ókildigi Jastar isi sektorynyń jetekshisi Rahymjan Joldas qatysyp qaıtty.

Jıynnyń maqsaty – qazaq halqynyń ulttyq dástúrlerin dáripteý, konfessııaaralyq dıalogty nyǵaıtý, sondaı-aq jastar arasynda ózara qurmet pen qoǵamdyq kelisim mádenıetin qalyptastyrý. Kezdesý barysynda Kórisý kúniniń rýhanı-adamgershilik mańyzy, onyń qoǵam birligin nyǵaıtýdaǵy róli jáne dástúrli qundylyqtardy jastar arasynda nasıhattaýdyń zamanaýı tásilderi talqylandy.

Is-shara barysynda qatysýshylarǵa Naýryznama onkúndigine arnalǵan mazmundy baıandama usynylyp, merekeniń tarıhy men rýhanı-mádenı mańyzy týraly aıtyldy. Sonymen qatar tarıhı-mádenı murany dáripteýge baǵyttalǵan taqyryptyq vıktorına uıymdastyryldy.

Kezdesý sońynda «Úzdik ulttyq kıim» jáne «Úzdik ulttyq áshekeı» nomınatsııalary boıynsha qatysýshylar marapattalyp, ulttyq qundylyqtardy dáripteýge baǵyttalǵan bastamalar qoldaý tapty.