«Jas kelinniń ádebi» atty semınar ótti (FOTO+VIDEO)

«Nur Astana» meshitinde qoǵam qaıratkeri Orazgúl Asanǵazyqyzynyń qatysýymen «Jas kelinniń ádebi» atty semınar ótti. Meshit janynda jumys isteıtin «Jibek» qyz-kelinshekter klýbynyń uıytqy bolýymen ótken semınarǵa ulttyq qundylyqtardy nasıhattap júrgen qoǵam qaıratkeri Orazgúl Asanǵazyqyzy men QMDB áıel-qyzdar sektorynyń Nur-Sultan qalasy boıynsha jaýapty mamany Dınara Qutqojaqyzy qatysty.

Klýb jetekshisi, «Nur Astana» meshitiniń ustazy Qarlyǵash Qajymálikqyzy jınalǵan qaýymǵa semınardyń maqsatyn túsindirip, kelgen qonaqtardy tanystyryp ótti. Elimizde ajyrasý qubylysy beleń alyp bara jatqany barshaǵa aıan. Onyń saldary – jalǵyzbasty ana, tolyqqandy tárbıe kórmegen bala. Bul óz kezeginde qoǵamnyń keleshegi úshin úlken qaýip.

Áıel jamaǵatynyń basyn qosyp, kóptegen tárbıelik, rýhanı, mádenı sharalardy uıymdastyryp júrgen «Jibek» qyz-kelinshekter klýby bul joly otbasynyń uıytqysy bolar ana – jańa túsken kelin ekenin eskerip, osy taqyryp aıasynda elordalyq arýlarǵa jan-jaqty maǵlumat berýdi maqsat etti.   

«Bala tárbıesin qazaq halqy ananyń qursaǵyna túsken kezeńnen bastap jiti qadaǵalaǵan. Sonyń ishinde qyz balanyń tárbıesine basa nazar aýdarǵan. Sebebi, qyz – eki eldiń arasyndaǵy elshi, bolashaq urpaqty tárbıeleıtin ana. Ónegeli tárbıe kórip ósken qyz bala kelin bop túsken shańyraqtyń mereıin asyryp, kórkeıte túseri belgili. Olaı bolsa, oń jaqtaǵy arýlarymyzdy bolashaq ana retinde, tutas bir otbasynyń uıytqysy retinde tárbıeleýimiz kerek», - dedi semınar qonaǵy Orazgúl Asanǵazyqyzy.