Jańa taǵaıyndalǵan bas ımam alǵashqy saparyn Abaı elinen bastady (FOTO)
Jaqynda ǵana QMDB tóraǵasy, Bas múftı Serikbaı qajy Oraz buıryǵymen Semeı óńiriniń bas ımamy bolyp taǵaıyndalǵan Asqar Ábitaıuly alǵashqy jumys saparyn ulylar mekeni – Abaı elinen bastady. Halqymyzdyń birtýar perzentteri máńgilikke damyl tapqan Jıdebaıǵa arnaıy at basyn buryp, Abaı men Shákárim babalarymyzdyń rýhyna Quran baǵyshtady. Uljan men Zere anamyzdyń da zırattaryn zııarat etip, marqumdar úshin duǵa jasady.
Semeı óńirindegi alǵashqy qadamyn kıeli ulylar rýhyna taǵzym etýden bastaǵan ókil ımam sapar barysynda Jıdebaıdaǵy Abaı murajaıymen tanysyp, Shyńǵystaý ólkesiniń tarıhyna qanyǵa tústi. Hakim Abaıdyń 175 jyldyq mereıtoıyna daıyndyq jumystarymen de tanysyp, ókildik tarapynan qashanda qoldaý bildirýge ázirlikterin jetkizdi.
Sapar sońy Abaı aýdanynyń ortalyǵy Qaraýyl aýylynda jalǵasyp, jańa ókil ımam jergilikti halyqpen júzdesý ótkizdi. Ákimshilik ǵımaratynda ótken júzdesý aıasynda Qaraýyldaǵy dinı ahýalmen tanysyp, turǵyndardyń usynys-tilekteri tyńdaldy. Danalardy dúnıege keltirgen Abaı eliniń ańqyldaǵan aq peıili men yqylas-nıetine alǵysyn bildirgen Asqar Ábitaıuly óz kezeginde Semeı óńiriniń rýhanı ómirine tyń serpilis jasap, halyq ıgiligine qyzmet jasaıtynyn jetkizdi.
Osylaısha, alǵashqy saparyn Abaı eliniń aq batasymen bastaǵan Asqar Ábitaıuly budan keıin aýdan ortalyǵyndaǵy «Qunanbaı qajy» meshitiniń jaı-kúıimen tanysyp, jamaǵatpen birge qulshylyq ótedi. Bútin bir aýyldy asyl dinimizge uıytyp otyrǵan qulshylyq ordasynyń jumys barysyn qadaǵalap, meshit ımamdarymen keńes ótkizdi.
