Jambyldyq ónertapqysh múgedekterge yńǵaıly velosıped túrin jasady
Jambyl oblysy Merki aýdanynyń jas ónertapqyshy Medet Álimjanov múmkindigi shekteýli jandar úshin velosıpedterden qurastyrylǵan «Qolǵanat» kollektsııasyn jasap shyǵardy.
«Aýdan ortalyǵynda árdaıym múgedekter arbasyndaǵy apany bir atanyń jaıaý alyp júretinin kóretinmin. Jańbyrly kúnderdiń birinde sol kisilerdi jol boıynan keziktirip, birden toqtap, mejeli jerine alyp barýǵa nıet tanyttym. Degenmen apa kólikke minýden bas tartty. Atadan surap, olardyń ortalyqtan 4-5 shaqyrymdaı qashyqtaý jerde turatynyn bildim. Osy jaǵdaıdan keıin men múgedekter arbasyn alyp júrýge yńǵaıly velosıped túrin jasaýdy oılastyra bastadym. Sóıtip, balamdy balabaqshaǵa alyp barýǵa arnaıy qurastyrǵan úsh dońǵalaqty velosıpedimdi múgedekter arbasyna yńǵaılastyrý joldaryna kiristim», - deıdi ol.
Sóıtip Medet úsh dońǵalaqty velosıpediniń rýlin alyp tastap, arbanyń artqy jaqtaýyna ońaı ilinetindeı etip qaıta qurastyryp shyqqan. Aıta keterligi, onyń týyndysy kez kelgen arbaǵa emin-erkin ornatyla beredi. Jalpy, kádýilgi velosıpedtiń dońǵalaǵy, pedali men aınalmaly shynjyry ǵana qalypty. Qalǵan bólikteriniń barlyǵyn Medet arbany tizgindeýshi adamǵa yńǵaıly etip qurastyra bilgen. Taǵy bir ereksheligi, mejelegen jerge jetken soń velosıped arbadan ońaı ajyratylady, ıaǵnı alyp júrýge yńǵaıly.
«Muny jasaýdaǵy maqsatym - múgedekterge arnalǵan arbany alyp júretin qamqorshylardyń jumysyn jeńildetý. Sebebi kóp jerde ınvo-taksıler júre bermeıdi. Sondyqtan eldi mekender arasynda munymen júrý óte yńǵaıly ári tebý jeńil»,- deıdi jas ónertapqysh.
Medetke jańa qurylǵyny jasap shyǵýyna bar-joǵy 4-5-aq kún ýaqyt ketipti. Al shyǵyny 40 myń teńgeni quraǵan. Bul qarjyǵa qajetti temir-tersekterdi satyp alǵan. Tolyqtaı qurastyryp shyqqannan keıin ol óz týyndysyn aldymen aýdandaǵy múmkindigi shekteýli balalar úıine baryp synaqtan ótkizip kóripti. Ondaǵylardyń barlyǵynyń kóńilinen tolyqtaı shyqqany onyń talabyna qanat bitiripti. Aldaǵy ýaqytta ónertapqysh osyndaı velosıpedti kóptep qurastyrýdy josparlap otyr.
