Zeket qory: Óńirlerdegi qaıyrymdylyq sharasy jalǵasyn tabýda (FOTO)
QMDB-ǵa qarasty «Zeket» korporatıvtik qaıyrymdylyq qorynyń bastamasymen oblys jáne aımaqtarda «Allanyń úıin taza ustaıyq» atty is-shara óz jalǵasyn tabýda. Atalǵan qaıyrymdylyq jobanyń aıasynda Qostanaı óńirindegi ókildik jergilikti jastarmen birlesip, meshit aýlasyna tazalyq jumystaryn atqardy.
Sol sekildi, «Jylýlyq syıla» atty shara barysynda Almaty óńirindegi «Zeket» ókildiginiń kómegimen kóp balaly Erjanova Kúlaıhan anamyz 2 tonna kómirmen qamtamasyz etildi. Shymkent qalasynda ornalasqan «Zeket» qorynyń ókildigi «Muqtajdyń muńyn bólis» joba barysynda múmkindigi shekteýli eki janǵa múgedekter arbasyn syıǵa tarta otyryp, 1 tonna kómir jáne azyq-túlikpen qamtamasyz etti.
Atalǵan joba legimen Mańǵystaý oblysynda áleýmettik jaǵdaıy tómen otbasylar men kóp balaly analarǵa azyq-túlik úılestirilip berildi.
Sonymen qatar, «Zeket» qory 2019 jylǵy josparyna sáıkes Túrkistan oblysy, Shardara aýdanynda ókildiktiń uıymdastyrýymen ár otbasyǵa 18 myń teńgeden bólingen 50 otbasyǵa jalpy eseppen 900 myń teńge kóleminde qarjylaı kómek kórsetildi.
28 qańtar Soltústik Qazaqstan oblysy «Qyzyljar» meshitinde jáne Qyzylorda qalalyq «Ernazar Maqsum» meshitinde jamaǵatqa aýyzashar dastarhany jaıylyp, zeket jaıly ýaǵyz aıtyldy.
Qostanaı oblysy boıynsha «Zeket» ókildiginiń qamqorlyǵyndaǵy Sháımerdenov Emırhan Azamatulyna 317 510 teńge emdelýine jınap berildi.
Astana qalasynda jumys aptasy «Zeket» qorynyń qyzmetkerleri men demeýshiniń muqtaj jandardyń úılerin aralaýmen bastalǵan bolatyn. «Zeket» qorynyń qamqorlyǵyndaǵy otbasy azyq-túlikpen qamtamasyz etildi. Sonymen qatar, jalǵyzbasty anaǵa qarjylaı kómek kórsetildi.
