ZAǴIP JANDARǴA BRAIL QARPINDEGI QURAN KÁRIM TARTÝ ETILDI

Astana qalasynyń bas ımamy Nurbek qajy Áýeshanuly elordadaǵy kózi kórmeıtin jáne nashar kóretin azamattarǵa arnalǵan arnaıy kitaphanaǵa baryp, zaǵıp jandarmen júzdesti.

Máýlit aıyna oraı uıymdastyrylǵan kezdesýde qala bas ımamy kitaphana qoryna Braıl júıesimen oqýǵa arnalǵan Quran Kárimniń kóptomdyq basylymyn tartý etti. Qasıetti kitaptyń arnaıy basylymy kózi kórmeıtin jandardyń Qurandy óz betinshe oqyp, rýhanı bilimin tolyqtyrýyna múmkindik beretin qundy syı boldy.

Júzdesýde Nurbek qajy Áýeshanuly aqsaqaldar men aq jaýlyqty ájelerdi qasıetti Máýlit aıymen quttyqtap, Paıǵambarymyzdyń (Oǵan Allanyń salaýaty men sálemi bolsyn) ónegeli ómiri men kórkem minezi jaıynda taǵylymdy nasıhat aıtty.

Al «Áziret Sultan» meshitiniń naıb ımamy Jumanazar Óserhanuly Máýlit jyryn oqyp, jamaǵat bolyp Paıǵambarymyzǵa (Oǵan Allanyń salaýaty men sálemi bolsyn) salaýattar aıtyldy.

Berekeli dastarhan basynda aqsaqaldar men ájeler óz ónerlerin ortaǵa salyp, kúı kúmbirlep, dástúrli án shyrqaldy. Máýlit aıynyń qurmetine arnaıy ázirlengen «Máýlit syıy» qorapshalary da tartý etildi.

Qasıetti kitapty qabyl alǵan aqsaqaldar men ájeler erekshe qýanyshqa bólenip, qala bas ımamyna aqjarma alǵystaryn jetkizdi. «Shuǵyla» qoǵamdyq birlestiginiń tóraıymy, kitaphananyń Braıl júıesi boıynsha oqytýshysy Baqytjamal Káribaıqyzy bastaǵan kitaphana ujymy da kórsetilgen qurmet pen jasalǵan syıǵa rızashylyqtaryn bildirdi.

Источник: Aisha