Vıtse-mınıstr: Sırııadan oralǵandardy memleket qamqorlyǵyna alamyz
11-qańtarda Astana qalasynda Qoǵamdyq damý vıtse-mınıstri Berik Saqbaıuly Aryn balalary terrorıstik belsendiligi joǵary Sırııa-Irak aımaqtaryna ketken ata-analarmen kezdesý ótkizdi. Jıynǵa QR azamattaryn elge qaıtarý máseleri boıynsha múddeli memlekettik organdardyń ókilderi qatysty.
Kezdesýde Elbasymyz N.Á.Nazarbaevtyń Qazaqstan azamattaryn Sırııadan Evakýatsııalaý jónindegi gýmanıtarlyq sharanyń aıaqtalýyna baılanysty jasaǵan málimdemesine baılanysty atqarylyp jatqan sharalar talqylandy.
«Jýsan» operatsııasynyń nátıjesinde Sırııadan 47 azamatymyz, onyń ishinde 6 er azamat, 11 áıel azamat jáne 30 bala qutqarylyp, elge qaıtarylǵany belgili.
Vıtse-mınıstrdiń sózine súıensek, qazirgi tańda elimizge oralǵan azamattar bir aı boıy beıimdeý ortalyǵynda qajetti medıtsınalyq, ońaltý, beıimdeý jáne basqa da (balalardy qujattandyrý, balabaqshaǵa, mektepke ornalastyrý, áleýmettik kómek kórsetý, psıhologııalyq kómek kórsetý jáne t.b.) kómek alady.
Esterińizge salsaq, 2018 jyldyń 21 qarashasynda QR Qoǵamdyq damý mınıstrliginiń basshylyǵymen ótken kezdesýde týyndaǵan máselelerdiń tez arada sheshý joldaryn qarastyrý úshin eki jaqtan «Baılanys toby» qurylyp, oǵan ata-analar komıteti men Mınıstrlik ókilderi kirgen bolatyn. Baılanys toby tarapynan shetelde júrgen azamattardyń tizimi retke keltirilip, tıisti quzyrly organdarǵa berilgen bolatyn.
Al, 11 qańtarda ótken kezdesý barysynda ata-analar tarapynan oralǵan balalardyń jeke qujattaryn rásimdeý, járdemaqy máselesin qaraý, shet eldegi týysqandarmen baılanysqa shyǵý jáne taǵy da basqa suraqtar qaralyp, olarǵa tolyq jaýap berildi.
Qoǵamdyq damý vıtse-mınıstri Berik Aryn qaqtyǵys aımaǵyndaǵy QR azamattaryn elge qaıtarý jáne olardy ońaltý boıynsha jumystar ári qaraı da jalǵasa beretindigin jáne bul jumystarǵa barlyq múddeli memlekettik organdar atsalysyp jatqanyn atap ótti. Sondaı-aq, osy jumysty budan ári «Baılanys toby» arqyly úılestirip otyrý týraly kelisim jasaldy.
