ULYS OŃ BOLSYN!
Naýryzbaı qajy TAǴANULY,
Qazaqstan musylmandary dinı
basqarmasynyń tóraǵasy, Bas múftı
Qadirli qaýym!
Sizderdi qasıetti Ramazan aıymen qatar kelgen shýaqty kóktem merekesi, kúlli túrki jurtynyń tól meıramy, jyl basymyz – áz-Naýryzben shyn júrekten quttyqtaımyn!
Izgilik pen birlikke bastaıtyn merekede barshańyzǵa Allanyń amandyǵyn, otbasy baqytyn, jannyń saýlyǵyn tileımin. Ulys oń bolsyn, aq mol bolsyn!
Osynaý ulttyq meıramda aq dastarhan basynda úlkender batasyn berip, birin-biri kópten kórmegen týystar máre-sáre bolyp, al renjiskender keshirim jolyn ustanyp, izgilikti isterimen urpaqqa ónege kórsetedi. Bul kúnde qorshaǵan ortany tazalaý, aǵash egý, bulaqtyń kózin ashý syndy saýapty hám salaýatty amaldar júzege asady. Mundaı ónegeli iske óskeleń urpaqty aralastyrýdyń mańyzy erekshe.
Naýryz – barsha adamzatty birlikke, ıgilikke, meıirimdilikke úndeıtin mereke. Qaraýsyz qalǵan qarttarǵa qamqorlyq jasap, naýqas jandardyń jaǵdaıyn surap, olarǵa merekelik kóńil-kúı syılaý – saýapty is.
Sonymen qatar aǵaıyn arasynda, qoǵam ishinde kómekke muqtaj azamattarǵa qol ushyn berýge asyǵaıyq. Bul – taǵylym men tárbıege toly Naýryz merekesin nasıhattaýdyń úlken múmkindigi.
Alys-jaqyn jerdegi aǵaıyndy merekemen quttyqtap, áleýmettik jaǵdaıy tómen týysqandarǵa múmkindiginshe materıaldyq turǵydan qoldaý kórsetkenimiz abzal. Óıtkeni ardaqty Paıǵambarymyz (oǵan Allanyń salaýaty men sálemi bolsyn) saýapty isti óz otbasymyzdan, aınaladaǵy aǵaıyn-týystan bastaýdy ósıet etken.
Baýyrmaldyq pen tatýlyqqa úndeıtin osynaý shýaqty merekede ár otbasyǵa baqyt pen birlik, tatýlyq pen bar jaqsylyqty tileımin.
Merekede aıtylǵan bata-tilek, árbir jaqsy sózimiz ben duǵamyz qabyl bolǵaı. Alla Taǵala halqymyzǵa amandyq, jurtymyzǵa tynyshtyq násip etip, ár shańyraqtyń berekesi men yrzyq-nesibesin arttyrǵaı.
Ulys oń bolsyn, aq mol bolsyn! Ámın!
