Ulyq mereke ulttyq naqyshta toılanatyn bolady (FOTO)

Qasıetti Qurban aıt merekesi el astanasy Nur-Sultan qalasyndaǵy qulshylyq ordalarynda ulttyq naqyshta árlenip, salt-dástúr sabaqtastyǵy aıryqsha dáripteletin bolmaq. Osy oraıda Bas shahardaǵy meshitter aýlasyna aıt kúnderi arnaıy kıiz úıler tigilip, qazaqy qonaqjaılyǵymyz pash etiledi.

Aıt namazyna jıylǵan jamaǵat arasynda bul kúni ulttyq sport oıyndary boıynsha saıystar uıymdastyrylyp, dýmandy merekege ulasatyn bolmaq. Sondaı-aq, qaladaǵy qulshylyq ordalarynda «Meıirimdilik mekeni» jobasy aıasynda qaıyrymdylyq jármeńkesin uıymdastyrý josparlanǵan. Buǵan qosa, mereke meıirin sezindirý maqsatynda «Qurban aıtta qýandyr!» atty qaıyrymdylyq jobalary da jandana túspek.

Qurban aıt merekesine qatysty búgingi ótken baspasóz konferentsııasynda osyndaı ıgi josparlar jaıy aıtylyp, qaladaǵy qulshylyq ordalarynyń ulyq merekege ázirlikterimen bólisti.