Ulttyq qundylyqtar nasıhattalǵan otbasylyq baıqaý ótti (FOTO)

Kóktemniń alǵashqy aptasymen kelip jetken aıtýly mereke – Halyqaralyq áıelder kúni qarsańynda Nur-Sultan qalasynyń Qoǵamdyq damý isteri basqarmasy jáne Din problemalaryn zertteý ortalyǵynyń uıymdastyrýymen «Qyz – erkem, qylyǵymen kórkem»  atty  áıel jamaǵatyna arnalǵan otbasylyq baıqaý bolyp ótti. Aıtýly sharaǵa atalmysh mekeme basshylary arnaıy qatysyp, quttyqtaý lebizderin bildirdi.

«4 apta – 4 qadam» keshendi jobasynyń «Mádenıet» aptasyna sáıkes uıymdastyrylǵan otbasylyq baıqaýdyń basty ereksheligi qatysýshylar analar 6-8 jas aralyǵyndaǵy qyzdarymen juptasyp óz óner kórsetip, tárbıe sabaqtastyǵyn pash etti. Ulttyq qundylyqtar nasıhattalyp, otbasy mártebesi dáriptelgen baıqaýǵa  belgili qoǵam qaıratkeri, «Úsh baılyq» qoǵamdyq birlestiginiń basshysy Orazkúl Asanǵazyqyzy, QMDB áıel-qyzdar sektorynyń meńgerýshisi Aqbópe Tilegenova,  Respýblıkalyq «Áziret Sultan» meshiti ustazy Dınara Nurǵalıeva, «Rýhanı Jańǵyrý» jobalyq keńsesiniń dırektory Aqerke Aqtaı hanymdar arnaıy shaqyrylyp, otbasylyq baıqaýdyń jeńimpazyn anyqtaýǵa tyrysty.

Qazylar alqasynyń ortaq uıǵarymy boıynsha, otbasylyq baıqaýdyń jeńis tuǵyrynan Aılanysh Amanbaıqyzy jáne qyzy Ámına tabyldy. Al, Otaeva Aıgerim jáne qyzy Saraǵa júldeli II oryn buıyrsa, Sarıeva Dınara jáne qyzy Káýsar III oryndy ıelendi.

Merekelik shara sońynda barlyq qatysýshylarǵa arnaıy syılyqtar tabys etilip, berekeli basqosý kofe-breık dastarhanyna jalǵasty.

Sýretterdi «FOTOGALEREIa» aıdarynan kóre alasyzdar!