Túrkistandyq kóp balaly anaǵa tegin úı berildi

QMDB Túrkistan oblystyq ókildiginiń uıymdastyrýymen qaladaǵy «Juma» meshitiniń jamaǵaty birigip kóp balaly otbasyǵa baspana syılady.

Shańyraq ıesin quttyqtaı barǵan oblys ımamy jaqsy jańalyq jetkizdi. QMDB tarapynan atqarylatyn 4 baǵyttyń biri qaıyrymdylyq ekendigin, ótken jyly ımamdardyń aralasýymen osy tapsyrma aıasynda oblys boıynsha 12 baspana berilgenin, Túrkistan qalasynda 2 órtengen úıge járdem jetkizilgenin atap ótip, aldaǵy jyly taǵy bir otbasyǵa baspana əperý josparda baryna toqtaldy, Musabek Aqtamberdi. Sondaı-aq, ıgi iske atsalysyp, qaıyrymdylyq etken «Juma» meshitiniń jomart jamaǵatyna bereke tiledi.

Al, 6 balasymen dalada qaldyrmaı, otaý tartý etken jurtshylyqqa Gúlnaz Qudaıbergenqyzy: «Balalarymmen qansha jyl páterden páter kóship, kóp qıyndyq kórip qınaldym. Endi mine Allaǵa shúkir bul kúnge de jettik. Barsha járdemshi bolǵan azamattarǵa Alla Taǵala razy bolsyn»,- dep aqjarma tilegin jaýdyrdy.

Qýanyshqa ortaqtasyp kelgen aqsaqaldar aq batasyn berip, ımamdar men jergilikti jamaǵatqa rızashylyqtaryn bildirdi. Quran oqylyp, dəstúrge saı shúkirshilik dastarhany jaıyldy.

​