Túrkistanda ımamdardyń aımaqtyq forýmy ótti (FOTO)

Qazaqstan musylmandary Dinı Basqarmasynyń tóraǵasy, Bas múftı Serikbaı Orazdyń pármenimen qurylǵan Múftııattyń Túrkistan qalasyndaǵy Keńsesine 1 jyl toldy.

Osyǵan oraı "Din men dástúr úılesimi jáne urpaqtar sabaqtastyǵy" atty ımamdardyń aımaqtyq forýmy ótti. Otyrar aýdanyna Jambyl, Qyzylorda, Túrkistan oblystary men Shymkent qalasynan 500 din qyzmetkeri qatysty.

Tóraǵa orynbasary, Túrkistan qalasyndaǵy Keńse basshysy Alaý Ádilbaev bul forýmdy uıymdastyrýdaǵy maqsaty úsh taraptyq yqpaldastyq ornatý bolǵanyn jáne de údesinen shyqqanyn aıtty. Nátıjesinde oblystyq Ardagerler keńesi men keńse basshylary rýhanı jańǵyrý, salt-dástúrdi saqtaý, urpaq tárbıesi, qoǵam tynyshtyǵy jolynda birlesip jumys isteýge kelisip, memorandýmǵa qol qoıyldy. Otyrar aýdanynyń ákimi Erlan Aıtahanov ta bul iste ımamdarǵa senim bildirdi. Ákimniń alǵys hatymen naıb múftı Alaý Ádilbaev Shymkent qalasy men Túrkistan oblysynyń ókil ımamdaryn, birqatar din qyzmetkerlerin marapattady.

Jıyn sońynda din men dástúrdiń jańǵyrýyna, QMDB Ǵulamalar keńesiniń aýyzbirshilikti saqtaý, basshyǵa baǵyný, jurtty ımandylyqqa uıytý, urpaq tárbıesi, janaza jáne jerleý rásimderin birizdilendirýde kúsh salýǵa úndeý qabyldandy. Naıb múftı Alaý Ádilbaev kelesi forýmnyń kezegin Shymkent qalalyq ókildigine tabystady. Dinı basqarma atynan Túrkistan oblysynyń 1 jyldyǵymen quttyqtady.