Túrkistanda Abaıdyń 175 jyldyǵyna arnalǵan semınar ótti (FOTO)

Uly aqynnyń týǵanyna 175 jyldyq mereıtoıyna oraı Túrkistanda «Abaı murasynyń rýhanı tárbıelik máni, taǵylymdyq baǵyt-baǵdary» atty oblystyq semınar ótti. Oǵan QMDB Tóraǵasynyń birinshi orynbasary Naýryzbaı Taǵanuly, RANT múshesi Arman Qýanyshbaev, elge belgili abyz-ustaz Abdýlla Joldas, aýdan-qala ımamdary men oblystyq Din máselelerin zertteý ortalyǵynyń teologtary qatysty. Semınar barysynda ımamdarǵa aqıda, fıkh, halal standarttaý jáne t.b taqyryptarda arnaıy dárister ótkizildi. 

Birinshi naıb Múftı Naýryzbaı Taǵanuly halyqty dinı saýattyndyrý úshin ımamdardyń bilimin jetildirý kerektigin aıtyp, bul maqsatta ókildik janynan kadrlardyń biliktiligin arttyrý jáne qaıta daıarlaý kýrstaryn ashýdy, toqsandyq, jyldyq jospar túzip, Imam Matýrıdı mektebin qalyptastyrýdy tapsyrdy. Imamdarǵa qyzmetke adaldyq tanytyp, jaýapkershilikpen atqarýǵa shaqyrdy. Ókil ımam Musabek Aqtamberdi jumystarmen tanystyrdy. Sondaı-aq, aýdan-qala ımamdaryna arnalǵan «Bilimdige dúnıe jaryq» atty jarys jarııalanǵanyn málimdedi. Imamdardyń baby synalatyn saıysqa baǵasyn berýge QMDB Tóraǵasynyń birinshi orynbasary shaqyryldy.