Terrorızm babymen túrmede otyrǵan jigit ókinishin aıtty
19 jasynda terrorızmdi nasıhattap, tyıym salynǵan vıdeolardy qaraǵany úshin bas bostandyǵynan aıyrylǵan aqtóbelik Ermek Eltaev óziniń ókinishti oqıǵasymen bólisti. Otyz jasqa qaraǵanynda bostandyqqa shyqqan jigit basqalarǵa sabaq bolýy úshin óz jaǵdaıyn baıandap berdi. Óziniń aıtýynsha, ol 2008 jyly 18 jasynda namaz oqýdy bastaǵan eken.
«Ol kezde Qandyaǵash qalasynda mazhab ustanatyndar óte az bolatyn. Internettiń endi damyp jatqan kezi. Jıhadqa shyǵýǵa qatysty neshe túrli vıdeolar júrdi. Jas boldyq, bala boldyq… Dinı bilimimizdiń joqtyǵynan qatelesip, meshitten bilim alǵan joqpyz. Adasýshylyqqa túsip qaldyq. 2009 jyldary meshitten tys úılerde jamaǵat bolyp jınalyp, neshe túrli jat aǵymnyń lektsııalaryn tyńdap, vıdeolar kórdik», – deıdi Ermek Eltaev.
Jas ǵumyry temir tordyń ar jaǵynda ótken jigit esil kúnderin ókinishpen eske alady.
«Taǵdyr, synaq shyǵar… Sol on jyldyń ishinde ımamdarmen, teologtarmen kezdestik. Oılanýǵa ýaqyt jetkilikti boldy. Qazir Ábý Hanıfa mazhabymen qulshylyq qylyp júrmin. Islam dini árqashan ata-anaǵa jaqsylyq qylýdy nasıhattaǵan. Týystyq qatynasqa kóp kóńil bólgen. Jastarǵa aıtarym, bárimiz qazaqpyz, ata-babamyz qazaq. Beıbit elde ómir súrip jatyrmyz. Bir jolda bir basshyǵa, bir ımamǵa baǵynyp, tatý ómir súrgenge jetsin! Bólingendi bári jeıdi, bir bolaıyq», – deıdi ol.
