Terrorıst Rýslan Kúlekbaev eki ret sýıtsıd jasamaqshy bolǵan
«Almatylyq atqysh» Rýslan Kúlekbaev eki ret sýıtsıd jasamaqshy bolǵan. Bul týraly IIM Qylmystyq-atqarý júıesi komıteti Tengrinews.kz resmı saýalyna bergen jaýabynda málimdedi.
Almaty qalalyq qylmystyq ister jóninde mamandandyrylǵan aýdanaralyq soty Kúlekbaevty ólim jazasyna kesken edi. Qazirgi ýaqytta ol Qostanaı oblysyndaǵy ÝK-161/12 qaýipsizdigi joǵary mekemede.
«Sýıtsıdke qatysty aıtar bolsaq, ol jazasyn ótep jatqan ýaqytta eki jaǵdaı tirkeldi, der kezinde qylmystyq-atqarý júıesi onyń aldyn aldy. Ókinishke qaraı, ol áli de sýıtsıd jasaý múmkindigin izdep júr. Mekeme basqa da keshendi profılaktıkalyq sharalardy qoldanyp jatyr», – dedi komıtettegiler.
QAJK mamandarynyń aıtýynsha, ólim jazasyna kesilgen sottalýshylar bir adamdyq kamerada jáne olarǵa kúsheıtilgen kúzet qamtamasyz etilgen. Sottalýshy qatań shartpen qamaýda.
«Kúlekbaevtyń tártibi teris pıǵyldy, ol birneshe ret tártiptik jaýapkershilikke tartyldy. Birinshi kúnnen bastap, depressııalyq jáne stressti basý úshin jáne jazasyn óteýge beıimdelý úshin sottalýshyǵa psıhologııalyq kómek kórsetilip keledi. Qashýǵa beıim, kúzetshilerge shabýyl jasaý, sýıdtsıdke barý jáne kepilge adam alý boıynsha profılaktıkalyq esepte tur. Affekt jaǵdaıynda kez kelgen áreketke barýy múmkin», - deıdi QAJK mamandary.
QAJK ókilderi, dinı taqyrypta jumystar istelip jatqanyna qaramastan (jyl basynan beri ımammen jáne teologpen 20 ret kezdesken), ol óziniń radıkal ustanymynan aıyǵar emes. Sonymen qatar, komıtet málimetinshe, onyń tarapynan dinı kózqarasty nasıhattaý baıqalmaǵan.
Eske salaıyq, 2016 jyly 18-shildede Almatyda terrorıstik akt bolǵan edi. Rýslan Kúlekbaev Almaly aýdandyq IIB men UQK departamentine qarýly shabýyl jasady. Atys saldarynan 10 adam qaza tapty. 2-qarashada Almatyda Rýslan Kúlekbaevqa ólim jazasyna kesilýi jáne múlki tárkilenýi týraly úkim shyǵaryldy.
