Tájýıd baǵdarlamasyn támamdaǵan 160 shákirtke Quran kárim tartý etildi (FOTO)
Búgin Astana qalasyndaǵy respýblıkalyq «Áziret Sultan» meshitiniń Dinı saýat ashý kýrsynyń áıel shákirtterine arnalǵan «Quran – sónbes sáýle, jaryq nur» atty saltanatty shara bolyp ótti. Meshit ustazdary Amankúl Abdramanova men Aıagóz Abdramanovalardan dáris alatyn 160-tan astam áıel shákirtterdiń tájýıd baǵdarlamasyn támamdap, Quranǵa túsýine oraı ótkizilgen shara aıasynda merekelik dastarhan jaıylyp, qasıetti Quran kitaby taratyldy.
Árbir árpi saýapqa tunǵan qasıetti Quran kárimniń tupnusqasyn óz betimen oqı alatyn dárejege jetken shákirtter yntasyn arttyryp, aradaǵy baýyrmaldyq sezimdi nyǵaıtýǵa baǵyttalǵan saltanatty sharaǵa Astana qalasyndaǵy Islam ortalyǵynyń ustazdary Aıgúl Kóksegen jáne Qarlyǵash Qajymálik qatysyp, shákirtterge izgi tilekterin arnady. Merekelik dastarhan basynda qasıetti Quran kárimniń hıkmetteri men kórkem minezge qol jetkizý taqyrybynda ýaǵyz aıtylyp, talmaı ilim izdenýge úndedi. Qazirgi tańda asyl dinimizdiń atyn jamylyp, adamdar sanasyn shyrmaýyqtaı arbap alǵan teris aǵymdardan saqtanýdyń abzal joly eń aldymen durys dinı bilim alyp, saýatty bolý kerektigin jetkizdi.
Aıta keteıik, búgingi tańda bilim-ǵylymnyń ordasyna aınalǵan respýblıkalyq «Áziret Sultan» meshitinde 300-den astam áıel shákirt dinı saýat ashyp, bilimin jetildirý ústinde. Qyrkúıek aıynda bastalǵan Dinı saýat ashý kýrsynyń bastapqy baǵdarlamasyn támamdaǵan shákirtterge arnalǵan bul shara kelesi aptada taǵy da jalǵasyn tappaq. Meshit ustazdary Gúlsara Beket pen Álııa Ómirbekovalardyń shákirtteri úshin de kelesi apta ishinde saltanatty shara uıymdastyrylyp, bilim jolyndaǵy alǵashqy jetistikterin atap ótetin bolmaq.
