TÁÝELSIZDIK HÁM TÁÝBEShILDIK
Qadirli jamaǵat!
Barshańyzdy Allanyń teńdessiz nyǵmeti – Táýelsizdik merekesimen quttyqtaımyn! Ár otbasyna baq pen bereke, yrys pen tabys tileımin! Azat eldiń araılap atqan ár tańy qýanysh pen jaqsylyqqa toly bolǵaı!
Allaǵa shúkir, bizdiń basty baılyǵymyz – táýelsizdigimiz. Eldiń amandyǵy men jerdiń tynyshtyǵynan, halyqtyń birligi men beıbitshiliginen asqan qundylyq joq. Biz qandaı belesti baǵyndyrsaq ta, qandaı asýdan assaq ta, táýelsizdigimizdiń arqasynda kóptegen jetistikterge jettik. Táýbe deımiz...
Bostandyqtyń qadirin bosqyn adam jaqsy biledi emes pe? Jaratýshy Jabbar Iemiz bosqyn jurttyń jaǵdaıynan saqtasyn. Biz azattyqqa nebir náýbetti kúnderdi bastan keship, arpalysyp, alysyp jetken halyqpyz. Endigi maqsat – táýelsizdik týy astynda birigip, el ıgiligi men halyq birligi jolynda qyzmet etý. Osyndaıda: «Otan úshin kúres – erge tıgen úles», – degen halyq danalyǵy oıǵa oralady.
Biz Elordada ótken III respýblıkalyq ımamdar forýmynda «Jeti rýhanı qazyq» Qazaqstan musylmandarynyń Rýhanı Tuǵyrnamasy qujatyn qabyldadyq. Osy tálimdik qujattyń ekinshi ustyny, ıaǵnı, ár musylmannyń tulaboıynan kórinýi tıis qasıet retinde «otanshyldyq» uǵymyn bekittik.
«Otandy súıý – ımannan», – degen ataly sóz bar. Bul – tilge jeńil bolǵanmen, júrekke jyly tıetin naqyl. Otbasyn izgilikke tárbıeleý, eldiń ıgiligine qyzmet etý, turaqtylyq pen tynyshtyqqa tileýles bolý, mine, Otandy súıý degen osydan bastalady. Otanshyl adam óz ortasyn bereke men birlikke bólep, izgilikke úndep júredi.
Adamnyń júregi tynyshtyq taýyp, tynyǵyp ta alatyn, qulshylyq ta jasaıtyn mekeni – óz úıi. Kez kelgen kisi óz úıinde ózin erkin sezinip, erekshe sezimge bólenedi. Mundaıda halyq danalyǵy: «Óz úıim – óleń tesegim», – deıdi.
Qaı jerde, qaı úıde úlde men búldege oranyp, qoshemetke bólenip júrgenimizben, óz úıimizge saǵynyshpen oralamyz. Óıtkeni, bizdiń júregimiz óz úıimizge baılanǵan. Sol sekildi, qanshama eldi sharlap, saıahat jasaǵanymyzben, óz Otanymyzdyń qadirine jetip, erekshe saǵynyshpen keri qaıtamyz. «Ár nárse óz negizine, óz turaǵyna qaıtady», – degen taǵylymdy tujyrymnyń pálsapalyq máni men maǵynasy osy bolsa kerek...
Iá, rasynda, týǵan eldeı el bolmas, týǵan jerdeı jer bolmas. Birde týǵan jeri – Mekkeden jyraqtap bara jatqan ardaqty paıǵambarymyz Muhammed (oǵan Allanyń salaýaty men sálemi bolsyn): «Sen jer betindegi eń kórikti, eń súıikti mekensiń. Men úshin senen artyq jer joq. Eger taǵdyr taýqymetine ushyramaǵanymda, ózińnen bir sátke de alystamas edim», – degen eken. Bul – bizge úlken sabaq. Paıǵambardyń ónegeli ómirinen tálim alǵan ár musylman óz Otanyn qyzǵyshtaı qorǵaýy tıis.
Qurmetti qaýym!
Táýelsizdik merekesi qutty bolsyn! Alla Taǵala birligimiz ben berekemizdi baıandy etsin! Elimiz aman, jurtymyz tynysh, eldigimizdiń irgesi berik bolsyn! Ámın!
Serikbaı qajy ORAZ,
Qazaqstan musylmandary dinı basqarmasynyń tóraǵasy, Bas múftı
