Tatarstan múftıi Bas múftı úndeýine qoldaý bildirdi
Tatarstan musylmandarynyń dinı basqarmasy Qazaqstannyń Bas múftıi Naýryzbaı qajy Taǵanulynyń musylman álemine jasaǵan úndeýine qoldaý bildirdi.
Tatarstan Dinı basqarmasy Qazaqstan múftıiniń koronavırýs indetiniń órshýine baılanysty álemdegi barsha musylman qaýymyn kúlli adamzattyń amandyǵy úshin bir mezette alaqan jaıyp, duǵa jasaýǵa shaqyrý jaıly bastamasyna qosyldy.
Tatarstan múftıi Kamıl haziret Samıgýllın Bas múftı Naýryzbaı qajy Taǵanulyna osy habardy jetkizip, birlesip duǵa etetinin málimdedi. Baýyrlas eldiń bas múftıi Islam áleminiń barsha jetekshilerin, medreseler ustazdary, Quran bilgirleri hám barsha musylman úmbetin 10 sáýir juma kúni besin namazy ýaqytynda «Biz – birgemiz, tilegimiz – ortaq» degen ıgi bastama aıasynda bir mezette alaqan jaıyp, duǵa jasaýǵa shaqyrdy. Osy maqsatta Kamıl haziret Samıgýllın Tatarstannyń ımamdary men musylmandarynda bir ýaqytta duǵa jasaý jaıly úndeýge atsalysýǵa úndedi.
Assalaýmaǵaleıkým, qurmetti baýyrlarym men qaryndastarym!
Ókinishke qaraı, qazirgi ýaqytta musylmandar bir qatarda sap túzep, ıyq tirestirip, Meıirimdi de Raqymdy, Qudiretti jáne Qamqor Alla Taǵalaǵa duǵa jasaý múmkindiginen aıyrylyp otyr. Alaıda musylmandar álemge qaýip tónip turǵan osyndaı qıyn ýaqytta duǵasyn toqtatqany durys pa? Joq, kerisinshe, biz, barsha álemniń musylmandary, qol jaıyp, nıetimizdi biriktirip, Alladan meıirim men keshirim surap, duǵa etýimiz kerek. Óıtkeni Ardaqty Paıǵambarymyz (oǵan Allanyń salaýaty men sálemi bolsyn): «Duǵa – musylmannyń qalqany», – degen.
Qazaqstan musylmandary dinı basqarmasynyń 10 sáýir juma kúni besin namazy ýaqytynda bir mezette alaqan jaıyp, duǵa jasaý jaıly úndeýin yqylaspen qabyl aldym. Bul bastama «Biz – birgemiz, tilegimiz – ortaq» degen taqyrypta ótedi. Tatarstannyń barlyq din jetekshilerin, medreseler ustazdaryn, Qurannyń bilgirleri men respýblıkamyzdyń barsha musylmanyn ortaq duǵaǵa qosylýǵa shaqyramyn jáne osy bastama jaıly barlyq baýyrlarǵa jetkizýdi amanattaımyn. Sebebi bizdiń birlesip jasaǵan duǵamyz adamzatty apattan qutqarýy ǵajap emes. Siz de qosylyńyz!
Tatarstan múftıi Kamıl haziret Samıgýllın
