Tarazda «Ál-Ádil» meshiti ashyldy (FOTO)

Taraz qalasynyń «Araı» shaǵyn aýdanynda taǵy bir kórikti de záýlim meshit boı kóterip, oǵan Allanyń 99 kórkem esimderiniń biri «Ál-Ádil» degen ataý berildi. 

Meshittiń ashylý saltanaty Jalǵasbaı Dúısenbaıulynyń Quran oqýymen bastalyp, Nur-Múbarak Egıpet ıslam mádenıeti ýnıversıteti rektorynyń keńesshisi Erjan qajy Malǵajyuly meshit salý týraly sóz sóıledi.

«Meshit salý Alla aldynda eń unamdy ári saýaby mol amaldardan. Mine búgin osyndaı qýanyshty sátte, qoı ústine boztorǵaı jumyrtqalaǵan kezeńde Alla úıi salynyp, qulshylyq etýge, barlyq dinı rásimderdi atqarýǵa jaǵdaı jasalyp otyr. Ata-babamyz ańsap ketken ıgilikterge, Allaǵa shúkirshilik etemiz!» – dedi Erjan qajy Malǵajyuly.

Kelesi kezekte kópshilikke Serikbaı qajy Oraz órkenıettiń bastaýy kóne Taraz halqymen amandyq surasqannan soń, meshit nyǵmetteri týraly ýaǵyz aıtty. Alla Taǵala týra jolǵa bastaý úshin meshittiń aınalasyn berekege toltyryp qoıady eken. Meshit adamdardy aqıqat pen izgilikke bastap, tárbıe mektebi bolady. Jer betinde meshit ashylǵanyna musylmandar qalaı qýansa, arshyda Allanyń ámirimen perishteler de solaı qýanady eken. Sondaı-aq, eń alǵash qazaq dalasyna kelgen ıslam baspaldaǵy kıeli Taraz qalasynan bastalyp, Áýlıe ata jerinde alǵashqy meshit salynǵanyn aıtyp ótti.

Serikbaı qajy Satybaldyuly «Ál-Ádil» meshitiniń ımamy bolyp Rasylhan Sybanbaıuly, al naıb ımamy bolyp Jalǵasbaı Dúısenbaıuly taǵaıyndalǵan buıryqty oqyp, tabystady. Buǵan deıin Rasylhan Sybaıbaıuly Taraz qalasyndaǵy «Keńeshan qajy» meshitiniń naıb ımamy qyzmetinde bolǵan.

Jańa meshitke kirgen jamaǵat Serikbaı qajynyń júrgizýimen juma ýaǵyzyn tyńdaǵan soń, 300-ge jýyq musylman juma namazyn oqydy.