«Sýsaǵanǵa sýsyn bol!» aktsııasy óz máresine jetti (FOTO)

Minekeı, qasıetti Ramazan aıymen qoshtasar sát te kelip jetti. Búgin – otyz kún orazanyń sońǵy aýyzashary. Ardaqty Paıǵambarymyz (s.ǵ.s.) óziniń hadısinde oraza ustaǵan jannyń qurmamen aýyz ashqany, qurma tabylmasa sýmen ashqany abzal ekenin ósıet eken.

Osyǵan oraı uıymdastyrylǵan Nur-Sultan qalasyndaǵy respýblıkalyq «Áziret Sultan» meshitindegi «Sýsaǵanǵa sýsyn bol!» qaıyrymdylyq aktsııasy búgin óz máresine jetti. Qasıetti aı boıy meshit qyzmetkerleri men shákirtteri qulshylyq ordasynda qurma taratyp, jamaǵatqa sýsyn usynyp kelgen bolatyn.

Ramazannyń sońǵy kúni meshit jastary qulshylyq ordasyna mańyndaǵy aıaldamalardy aralap, qoǵamdyq avtobýs júrginshilerine «ramazan sarqytyn» syılady. Ulyq mereke – Oraza aıt merekesimen quttyqtap, avtobýstaǵy barlyq adamdarǵa qurma men sý úlestirgen eriktilerge eldiń de alǵys-batasy qardaı jaýdy.

Aqsham namazynyń aldynda uıymdastyrylǵan ıgi shara qulshylyq ordasynyń aýlasyndaǵy jamaǵatty da qamtydy. Aq jaýlyqty ájelerimiz ben aqsaqaldy qarııalarymyzdyń batasyna bólenip, alǵystaryn alǵan saıyn eriktiler eń sońǵy qurma men sý qalǵansha zyr júgirip, qyzmet jasaýǵa qulshyna túskendeı.

Sýretterdi «FOTOGALEREIa» aıdarynan kóre alasyzdar!