Sońǵy 5 kúnde 30-ǵa jýyq qazaqstandyq qajy dárigerge qaraldy (FOTO)

Qasıetti mekenge taban tiregen paryzyn óteýshilerge alǵashqy medıtsınalyq kómek kórsetý bastalyp ketti.

Sońǵy 5 kúndegi statıstıka boıynsha 27 adam dárigerge qaraldy. Árbir kompanııanyń dárigerinen bólek, Qazaqstan qajylyq mıssııasy da ózimen birge bilikti úsh medıtsına mamanyn ala kelgen bolatyn. Aq halattylarǵa jetekshilik etý jumysy Nur-Sultan qalasy ákimdiginiń ShJQ «№2 qalalyq balalar aýrýhanasy» MKK-niń Bas dárigeri Birjan Dosmaılovqa tapsyryldy. Odan bólek mıssııa quramynda Ardaq Bekov jáne Aıgúl Zulqajy bar. Qazirgi ýaqytta mıssııa tarapynan uıymdastyrylǵan medıtsınalyq qyzmet kórsetý bólmesi táýlik boıy toqtaýsyz jumys istep tur. Qajetti degen barlyq dárimen qamtylǵan. Bilikti mamandar Mekkege kelgen boıda qajylyq kompanııalaryn aralap, ondaǵy el azamattarynyń densaýlyǵyn tekserip, kerekti keńesterin berdi. Óıtkeni Mekke qalasyndaǵy aptap ystyqqa baılanysty elden kelgen qajylardyń qan qysymy tez kóterilýde. Osyǵan oraı ystyqtan qorǵaný erejeleri jazylǵan shaǵyn eskertpeler de taratyldy.

Sondaı-aq shaǵym bildirgen naýqastarǵa sol mezette em-dom jasalýda. Osy merzim ishinde dárigerdiń emine júgingen 27 adamnyń 7-i júrek qan tamyry júıesi aýrýlarymen, 15 adam joǵarǵy tynys joly, asqazan, ishek joly aýrýlarymen naýqastanǵan 5 adam, tirek qımyl apparaty jáne teri aýrýlary boıynsha 5 adam medıtsınalyq kómek alǵan.

Jalpy alǵanda bıylǵy maýsymda Saýda Arabııasyna álemniń túkpir-túkpirinen qajylyǵyn óteýge kelgen 190 myń adam dárigerdiń kómegine júginipti.