Smaıyl Seıitbekov QMDB bólim meńgerýshisi bolyp taǵaıyndaldy (FOTO)
Qazaqstan musylmandary dinı basqarmasynyń tóraǵasy, Bas múftı Serikbaı qajy Orazdyń buıryǵymen Seıitbekov Smaıyl Súıerqululy Halal ónimderin standarttaý bóliminiń meńgerýshisi qyzmetine taǵaıyndaldy.
«Seıitbekov Smaıyl Súıerqululy Mańǵystaý oblysynyń bas ımamy, Aqtaý qaıyrymdylyq jeke mekemesiniń dırektory qyzmetterinen bosatylyp, QMDB «Halal ónimderin standarttaý» bólimine meńgerýshi bolyp taǵaıyndalsyn», – delingen Bas múftı buıryǵynda.
Elordada ótken QMDB Ortalyq apparatynyń kezekti hattamalyq jınalysynda Serikbaı qajy Satybaldyuly S.Seıitbekovty ujymǵa tanystyryp, onyń dinı saladaǵy ótili men mol tájirıbesin aıryqsha atap ótti. Bul taǵaıyndaý múftııat jumysyn ilgeriletýge oń serpin beretinin tilge tıek etti. Óz kezeginde Smaıyl Súıerqululy bólim jumysyn jandandyrý úshin bar kúsh-jigerin sarp etetinin jetkizdi.
Apparat jınalysyna birinshi naıb múftı, Nur-Sultan qalasynyń bas ımamy Naýryzbaı qajy Taǵanuly, naıb múftı Ershat Ońǵarov, QMDB Apparat basshysy Ǵylymbek Májıev, múftııat qyzmetkerleri qatysty.
Seıitbekov Smaıyl Súıerqululy
1976 jyly tamyz aıynyń 24 juldyzynda Ońtústik Qazaqstan oblysy, Túlkibas aýdanyda dúnıege kelgen.
1992 jyly mektep bitirgen soń Qazaqstan Respýblıkasy men Túrkııa Respýblıkasy arasyndaǵy kelisim shart negizinde Túrkııaǵa joǵary bilim alý úshin barǵan.
1992-1993 jyly Býrsa qalasyndaǵy túrik tilin úıretý ortalyǵynda til úırengen.
1993 jyly Býrsa qalasyndaǵy Ýlýdag ýnıversıtetinniń Ilahııat (teologııa) fakýltetine túsip, 1998 jyly «Teolog» mamandyǵy boıynsha bitirgen.
1998-2003 jyldar aralyǵynda Shymkent qalasyndaǵy Halyqaralyq Qazaq-Arab ýnıversıtetinde oqytýshy bolyp qyzmet atqarǵan. Ýnıversıtet qabyrǵasynda qyzmet etip júrip «Islam tarıhy (ámáýıler men abbasıdter kezeńi)» 2002, «Islam ádebi» 2003, atty kitap jazǵan.
2003-2005 jyldar aralyǵynda Ál-Farabı atyndaǵy Qazaq ulttyq ýnıversıtetiniń «Dintaný» mamandyǵy boıynsha magıstratýrasyn qyzyl dıplommen bitirgen.
2005-2007 jyldar aralyǵynda Ál-Farabı atyndaǵy Qazaq ulttyq ýnıversıtetiniń aspırantýrasyn tamamdaǵan.
2010 jyldyń 30 qańtar kúni Ál-Farabı atyndaǵy Qazaq ulttyq ýnıversıtetinde «Islamdaǵy sýnna iliminiń mádenı, tarıhı orny» taqyrybynda kandıdattyq dıssertatsııa qorǵaǵan.
Eńbek joly:
2004-2005 jyldar aralyǵynda Almaty qalasyndaǵy Tastaq meshitinde naıb ımam bolyp qyzmet etken.
2005-2011 jyldar aralyǵynda Qazaqstan Musylmandary Dinı Basqarmasynyń Batys Qazaqstan oblysy boıynsha ókil ımamy, Oral oblystyq ortalyq meshitiniń bas ımamdyq qyzmetin atqarǵan.
2008-2011 jyldar aralyǵynda «Oral medresesiniń» dırektory qyzmetin qosa atqarǵan.
2011-2013 jyldar aralyǵynda QMDB-nyń Dinı oqý-aǵartý bóliminiń meńgerýshisi qyzmetin atqardy.
2013-2019 jyldar aralyǵynda QMDB-nyń Mańǵystaý oblysy boıynsha ókil ımamy, Mańǵystaý oblystyq ortalyq meshittiń bas ımamy bolyp qyzmet etti.
2019 jyldyń 18 qazanynan bastap QMDB «Halal ónimderin standarttaý» bólimine meńgerýshi bolyp taǵaıyndaldy.
Otbasyly, 5 uldyń ákesi.
