Serikbaı qajy Oraz Ózbekstan múftıine kóńil aıtty

Qazaqstan musylmandary dinı basqarmasynyń tóraǵasy Serikbaı qajy Oraz Ózbekstan múftıi Osmonhan Alımovke inisi Islomhon Alımovtyń qazasyna baılanysty kóńil aıtty.

«Inińiz Islomhon Alımovtyń qazasy týraly qaraly habardy aýyr kúızelispen qabyldadym. Ózimniń, Ǵulamalar Keńesi jáne Qazaqstan musylmandary atynan Sizge, týǵan-týystaryńyzǵa qaıǵylaryńyzǵa ortaqtasa otyryp, kóńil aıtamyn. Alla Taǵala marqumdy Óz meıirimine bólep, raqymyna alǵaı.

Qazaq-ózbek – baǵzy zamannan týys halyq. Biz bir-birimizdiń qýanyshymyz ben qaıǵymyzdy bólisip kele jatqan baýyrlas elmiz. Qazaqstandaǵy musylman jamaǵaty Sizdiń otbasyńyzdaǵy qaıǵyly jaǵdaıǵa baılanysty óziniń duǵa-tilekterin jetkizýde. Din salasynda qyzmet etip jatqan qazaqstandyq áriptes baýyrlaryńyz, ımam-moldalar da duǵa-tilekte. Jaratýshy Jabbar Iemiz bul qazany qaıyrly etkeı. Sizge, aǵaıyn-jurt týystaryńyzǵa Alladan kórkem sabyr tileımiz. Baýyryńyz Islomhonnyń ımany salamat bolyp, jany jánnatta bolǵaı. Ámın», – delingen Serikbaı qajy Satybaldyulynyń joldaǵan kóńil aıtý jedelhatynda.