Semeılik ımamdar Abaı álemine saıahat jasady (FOTO)

Abaı hákimniń 175 jyldyq mereıtoıyna oraı QMDB-nyń Semeı aımaǵy boıynsha ókildigi de eleýli sharalardy qolǵa alyp otyr.

Sonyń aıasynda aımaqqa qarasty meshitterdegi din qyzmetkerleri, aýdan-aýyl ımamdary shahardaǵy Abaıdyń ádebı-memorıaldyq murajaıynda bolyp, aqyn ómirine qatysty qundy jádigerlerdi tamashalap, Ekskýrsııa jasady.

Din qyzmetkerleri úshin bul tanymdyq is-shara tuńǵysh ret uıymdastyrylyp otyr. Bas ımam Asqar Muqanovtyń bastamasymen ótkizilgen Ekskýrsııa barysynda ımamdar murajaıdyń kórme-zaldaryndaǵy Abaıdyń ózi tutynǵan zattardy kórip, syryna qanyqty. Onyń kópshiligin aqynnyń ózi Semeıdegi ólketaný murajaıyna tapsyrypty. Sol tárizdi tamashalaýshylar Abaıdyń óz uly Maǵaýıaǵa jazǵan hatyn da kórip, oqı aldy.

Imamdar sondaı-aq, kóne Shaǵataı tilinde, qadım jazýymen basylǵan tarıhı ádebıetterge de nazar aýdardy. Murajaı qyzmetkerleriniń aıtýynsha, munda arab qarpimen jazylǵan 252 kóne kitap bar. Olardyń barlyǵy derlik zamanynda Abaı tálim alǵan Ahmet Rıza medresesiniń qoljazba jınaqtary eken.

Din qyzmetkerleri sondaı-aq, Abaı hakimniń jasóspirim shaǵynda turaqty jatyp oqyp, dinı dáris alǵan Ahmet rıza medresesinde de bolyp, sırek kezdesetin tarıhı kitaptardyń túpnusqalarymen tanysty. Ásirese, Abaı dáýirinde medrese shákirtteriniń qoltańbalary, esepter men arab-parsy tilindegi shımaı-jazýlary bar kóne esikke basa kóńil aýdardy. Bul – hákimniń alaqanynyń taby qalǵan asa qundy jádiger.