Saýd Arabııasy koronavırýsqa baılanysty elge kirgizýdi ýaqytsha toqtatty
Búgin, 27 aqpan kúni Saýd Arabııa Koroldigi álemge qaýip tóndirip turǵan koronavırýs indetinen saqtaný maqsatynda umra qajylyǵyn jasaý úshin Mekke men Mádına qalalaryna kirýdi ýaqytsha toqtatty.
Bul týraly Saýd Arabııanyń Syrtqy ister mınıstrligi (SIM) óziniń Twitter-degi paraqshasynda: «Patshalyqqa umra qajylyǵyn jasaý jáne Paıǵambar (s.ǵ.s.) meshitin zııarat etý úshin kirý ýaqytsha toqtatyldy!» dep habarlady.
Koroldiktiń Syrtqy ister mınıstrligi koronavırýstyń taralý qaýpi joǵary elderdiń azamattary úshin týrıstik jáne umra vızalarynyń berilýin de ýaqytsha toqtatty. Sondaı-aq tek koronavırýstyń taralý qaýpi bar elderden kelgen týrıstik vızalardyń ıelerine ǵana emes, álemniń ár túpkirinen kelgen týrısterge elge kirýge tyıym saldy.
Umra maýsymyn uıymdastyrýda da bıyl Saýd Arabııa Koroldigi (SAK) birqatar ózgeris jasady. Budan bylaı álemniń 49 eli SAK-qa 1 jyldyq týrıstik vıza rásimdeý múmkindigine qol jetkizdi. Onyń ishinde Qazaqstan da bar (Vıza 1 jylǵa beriledi. Birneshe ret kirip-shyǵý múmkindigi bar. Bir kirgende 3 aıǵa deıin qalýǵa bolady). Osy oraıda elimizdegi jaýapty mekemeler eki el arasyndaǵy tyǵyz qarym-qatynasty nyǵaıtý jolynda orasan zor jumystar atqarǵanyn eskergen jón. Atalmysh týrıstik vıza arqyly Mekke men Mádına qalalaryna kirý, umra jasaý múmkindigi jáne Koroldiktiń barlyq ólkesine saıahat jasaý múmkindigi qarastyrylǵan edi.
Alaıda Saýd Arabııa Ishki ister mınıstrliginiń habarlaýynsha, joǵarydaǵy týrıstik vıza rásimdeý múmkindigine qol jetkizgen 49 memlekettiń ishinen 22 memleketke týrıstik vızamen kirý ýaqytsha toqtatyldy. Olar – Qytaı, Iran, Italııa, Koreıa, Japonııa, Taıland, Malaızııa, Indonezııa, Pákistan, Aýǵanstan, Irak, Fılıppın, Sıngapýr, Úndistan, Lıvan, Sırııa, Iemen, Ázirbaıjan, Qazaqstan, Ózbekstan, Somalı, Vetnam.
Aıta keteıik, 2019 jyldyń 31 jeltoqsanynda Qytaı bıligi Dúnıejúzilik densaýlyq saqtaý uıymyna (DDSU) eldiń ortalyq bóligindegi Ýhan qalasynda (HýbEı provıntsııasy) belgisiz indettiń órshýi týraly habarlaǵan bolatyn. Sarapshylar aýrýdyń qozdyrǵyshyn anyqtap, bul koronavırýs indeti ekenin málimdegen. DDSU indetti halyqaralyq mańyzy bar tótenshe jaǵdaı dep jarııalap, jańa vırýsqa COVID-19 degen resmı ataý berdi.
